حکومت کا کہنا ہے کہ ان انتخابات کا جموں و کشمیر کی تعمیر و ترقی کے ساتھ تعلق ہے۔ گاؤں دیہات میں لوگوں کی فلاح و بہبود کے لئے یہ انتخابات منعقد کرائے جا رہے ہیں۔
ریاستی الیکشن کمشنر کے کے شرما نے ای ٹی وی بھارت کے ساتھ خصوصی گفتگو میں کہا کہ کچھ مقامات پر سرپنچ اور پنچ کے لئے دوبارہ سرکار کی جانب سے نوٹیفکیشن جاری کی جائے گی جہاں پر امیدواروں نے نامزدگی کے کاغذات دائر نہیں کئے تھے۔ ان پنچایت حلقوں میں پھر سے انتخابات منعقد کرائے جائیں گے۔
کے کے شرما نے کہا کہ ڈی ڈی سی انتخابات اور پنچایتی و بلدیاتی اداروں کے ضمنی انتخابات کو پُرامن طور منعقد کرنے کے لیے حفاظت کے سخت ترین انتظامات کئے ہیں۔
انہوں نے بتایا کہ انتخابات میں حصہ لینے والے تمام امیدواروں کے لیے سکیورٹی کے انتظامات کیے گئے ہیں۔
کے کے شرما نے بتایا کہ جموں و کشمیر پولیس گزشتہ کئی برسوں سے انتخابات کو پُرامن طریقے سے منعقد کرانے کے لیے اہم رول ادا کر رہی ہے اور سکیورٹی اہلکاروں کو پتہ ہے کہ حساس اور انتہائی حساس علاقے کون سے ہیں'۔
ریاستی الیکشن کمشنر نے ان الزامات کو مسترد کیا جس میں گپکار الائنس کے امیدوار دعویٰ کر رہے ہیں کہ انہیں سکیورٹی فوراہم نہیں کی گئی ہے اور جہاں سکیورٹی فراہم کی گئی ہے وہاں امیدواروں کو تشہیر کرنے میں رکاوٹیں پیدا کی جا رہی ہیں۔
