سرینگر میں محکمہ پی ڈی ڈی کے ہیڈکوارٹر پر جمع ہو کر پی ڈی ڈی سے وابستہ درجنوں ملازمین نے گورنر انتظامیہ کے خلاف جم کر نعرے بازی کی۔
انکا کہنا تھا کہ ’’ملازمین یک زبان ہوکر محکمے کی مجوزہ نجکاری کے خلاف ہیں اور اس کی شدید الفاظ میں مذمت کرتے ہیں۔‘‘
میڈیا کے نمائندوں سے بات کرتے ہوئے احتجاج کرنے والے ملازمین کا کہنا تھا کہ ’’اس سے قبل بھی سابقہ حکومتوں نے محکمہ کی نجکاری کی کوششیں کی تھیں جس کے خلاف ملازمین نے متحد ہوکر احتجاج کیا تھا۔‘‘
انہوں نے مزید کہا کہ ’’اُس وقت احتجاج کے بعد سرکار نے محکمہ کی نجکاری کے مجوزہ فیصلے کو واپس لیا تھا جس کا تحریری طور ہمارے پاس ثبوت بھی ہے۔‘‘
احتجاجی ملازمین نے الزام عائد کرتے ہوئے کہا کہ ’’خفیہ طور سے نجکاری کا عمل شروع ہو چکا ہے اور ٹینڈر بھی جاری کیے گئے ہیں۔‘‘
پی ڈی ڈی احتجاجی ملازمین کا مزید کہنا تھا کہ ’’اگر محکمہ کی نجکاری کی گئی تو مستقل و یومیہ اجرت پر کام کر رہے ملازمین یکجا طور پر سرکار کے اس فیصلے کے خلاف احتجاج کریں گے۔‘‘
