عالمی وبا کورونا وائرس نے پوری دنیا کو اپنی زد میں لے لیا ہے۔ ملک کے اندر لاکھوں لوگ لقمۂ اجل بن چکے ہیں۔ آکسیجن اور ہسپتالوں کی عدم موجودگی سے ہزاروں لوگ اپنوں کو وقت سے پہلے الوداع کہہ گئے ہیں۔ جموں و کشمیر کے اندر کورونا تیزی کے ساتھ پیر پھیلا رہا ہے۔ اس کے لئے ضلع سطح پر تیاری شروع کردی گئی ہے۔
خطہ چناب کے ضلع ڈوڈہ میں انتظامیہ نے ہنگامی سطح پر تمام پنچایتوں میں سینٹرز کا قیام عمل میں لانے کا کام شروع کر دیا ہے۔
اس سلسلے میں انتظامیہ کی طرف سے نامزد ٹیموں نے نوڈل آفیسر کی نگرانی میں ٹرکوں کے ذریعے سامان کو پنچایتوں کی طرف روانہ کیا۔
کووڈ کیئر سینٹر کے نوڈل آفیسر ڈاکٹر شاہد لطیف زرگر نے بتایا کہ اُنہوں نے تمام مقررہ افسران و دیگر عملہ کے تعاون سے ضلع کے سبھی پنچایتوں میں پانچ بیڈز والے کووڈ کیئر سینٹرز کے لئے ضروری سامان جس میں بیڈ شامل ہیں، ان کو پنچایتوں میں بھیجا جارہا ہے۔
دیکھنے والی بات یہ ہے کہ انتظامیہ کی طرف سے کی جارہی تیاری عوام کے لئے کتنی مفید ثابت ہوگی یا پھر ہمیشہ کی طرح کاغذوں پر سمٹ کر رہ جائے گی۔
