کورونا وائرس کے پھیلاؤ کو روکنے کی خاطر ایک خاص مہم کے تحت ضلع انتظامیہ سرینگر نے پرے پورہ اور راج باغ علاقے میں قائم کوچنک مراکز میں کئی طلبا کا کورونا ٹیسٹ عمل میں لایا جس میں کئی طلبا کو کورونا مثبت پایا گیا۔
اس دوران انتظامیہ نے پایا کہ کئی طلبا کرونا وائرس سے متاثر ہونے کے باوجود مذکورہ ٹیوشن مراکز کا انتظامیہ اپنی تدریسی سرگرمیاں جاری رکھے ہوئے ہے جوکہ نہ صرف دیگر طلبا و طالبات کے لئے خطرناک ہے بلکہ اساتذہ کے علاوہ کوچنک مراکز کے عملے کے لئے بھی۔
اس صورتحال کے پیش نظر ضلع انتظامیہ نے جاری ایک حکمنامے میں نہ صرف ان ٹیوشن مراکز کو اگلے 21 دن بند کرنے کا حکم دیا بلکہ یہ بھی انتباہ دیا ہے کہ اگر کوئی کووڈ 19 رہنما خطوط کی خلاف ورزی کرتے ہوئے پایا گیا تو اس کے خلاف ڈیزاسٹر مینیجمینٹ ایکٹ 2005 کے تحت سخت کارروائی عمل میں لائی جائے گی۔
اس حوالے سے جاری کردہ حکمنامے میں مزید کہا گیا ہے کہ اگر کسی ٹیوشن مرکز میں کوئی بھی کورونا وائرس سے متاثر ہوتا ہے تو اس ٹیوشن سینٹر کے انتظامیہ کو اپنی تدریسی سرگرمیوں کو فوری طور بند کرنا چاہیے اور جب تک کہ 21 دن تک متاثرہ کا کووڈ ٹیسٹ منفی نہیں آتا ہے تب تک ٹیوشن مرکز میں کوئی سرگرمی نہیں ہونی چاہیے جبکہ سینٹر کو بہتر طور سینیٹائز کر کے ہی تدریسی سرگرمیاں پھر سے بحال کی جانی چاہئے۔
