پروفیسر معراج الدین کشمیر یونیورسٹی کے علامہ اقبال لائبریری آڈیٹوریم میں قومی کونسل برائے فروغ اردو زبان کی ایک تقریب سے خطاب کررہے تھے جس میں کونسل کی طرف سے وادی کشمیر میں چلائے جارہے کمپیوٹر، اردو، عربی اور فارسی مراکز کے ذمہ داران اور طلبا شریک تھے۔ تقریب کے دوران مختلف کورسوں کے کامیاب طلبا میں اسناد تقسیم کی گئیں۔
تقریب میں قومی کونسل برائے فروغ اردو زبان کے ڈائریکٹر ڈاکٹر عقیل احمد، کشمیر یونیورسٹی کے وائس چانسلر پروفیسر طلعت احمد اور دیگر معززین بھی موجود تھے۔
سنٹرل یونیورسٹی آف کشمیر کے وائس چانسلر نے اپنی یونیورسٹی میی اردو جرنلزم کا ڈپلوما کورس متعارف کرانے کا اعلان کرتے ہوئے کہا: 'سنٹرل یونیورسٹی آف کشمیر اور کشمیر یونیورسٹی مل کر یہاں اردو جرنلزم کو فروغ دینے کی کوششیں شروع کریں گی۔ سنٹرل یونیورسٹی میں ہماری کوشش ہے کہ اردو جرنلزم میں ڈپلوما کورس شروع کیا جائے۔
پروفیسر معراج الدین نے دعویٰ کیا کہ وادی کشمیر میں اب اردو اخبارات کی اشاعت اور سرکولیشن میں کمی آرہی ہے۔
تقریب سے خطاب کے دوران کشمیر یونیورسٹی کے وائس چانسلر پروفیسر طلعت احمد نے کہا کہ اردو جرنلزم کے کورسز شروع کرنے کی تجویز بہت اچھی ہے اور اس سے اردو پڑھنے لکھنے والے طلبا کی صلاحتیوں میں نکھار پیدا ہوگا۔ تاہم انہوں نے کہا کہ وہ مثبت صحافت چاہتے ہیں جس کے ذریعے اچھے کاموں کو اجاگر کیا جائے۔
پروفیسر طلعت احمد نے مزید کہا کہ لوگوں کو انگریزی اخبارات کے ساتھ ساتھ اردو اخبارات بھی پڑھنے چاہیے۔ ان کا کہنا تھا: 'ہم چاہتے ہیں ریاست میں اردو کو وہ حق ملے جس کی یہ حقدار ہے۔ ضرورت اس بات کی ہے کہ ہم لکھنے اور پڑھنے کے دوران اردو کا زیادہ سے زیادہ استعمال کریں۔
