مرکز کے زیر انتظام علاقہ جموں و کشمیر کے ضلع رامبن کے سب ڈویژن بانہال میں کووڈ-19 کے پانچ نئے معاملات سامنے آئے جن میں ایک حاملہ خاتون سمیت چار خواتین شامل ہیں۔
ضلع میں کورونا وائرس کے مثبت معاملات کی تعداد 222 ہوگئی ہے جبکہ 182 صحیتیاب ہوچکے ہیں اور دیگر 40 کا ضلع میں قائم کووڈ ہسپتال ڈھلواس اور کھانڈے ہسپتال بانہال میں علاج چل رہا ہے۔
ضلع کے سب ڈویژن بانہال میں پانچ نئے معاملے سامنے آنے کے بعد سب ڈویژن مجسٹریٹ بانہال ظہیر عباس بٹ نے دوبارہ چار دن کے لیے سخت ترین لاک ڈاؤن جاری کر کے خارپورہ سے نوگام تک کے تمام کاروباری اداروں اور دکانوں کو بند کرنے کا حکم جاری کیا ہے۔
ذرائع کے مطابق قصبہ میں خارجی اور داخلی راستوں کو خار دار تاروں سے مکمل طور سیل کر دیا گیا ہے۔
واضح رہے کہ اس سے قبل بھی رامبن میں چار خواتین کو کووڈ-19 سے متاثر پایا گیا تھا جس کی وجہ سے قصبہ بانہال کے لوگ خوف و ہراس میں مبتلا ہیں۔
