ترال میں کورونا کے پہلے کیس کی تصدیق

جموں و کشمیر میں کوروناوائرس تیزی سے پھیل رہا ہے اور خاص کر وادی کشمیر میں اس وائرس سے کافی تعداد میں لوگ متاثر ہوئے ہیں۔

جنوبی کشمیر کے سب ڈسٹرکٹ ترال میں کوروناوائرس کا پہلا کیس سامنے آیا ہے جس سے پورے علاقے میں تشویش کا ماحول پیدا ہوگیا ہے۔

تفصیلات کے مطابق نی بگ ترال میں 60 سالہ خاتون کو کورونا سے متاثر پایا گیا جو گزشتہ دنوں سرینگر کے ایک اسپتال میں جراہی کے عمل سے گزری تھی۔ یہ کیس سامنے آنے کے بعد پورے سب ڈسٹرکٹ ترال میں خوف و ہراس کا ماحول پیدا ہوا ہے۔

انتظامیہ نے اب نی بگ گاؤں کو ریڈ زون جبکہ نزدیکی چار دیہات ڈاڈسرہ، امیرآباد، نودل اور شیرآباد کو بفر زون قراد دیا گیا ہے۔

ضلع ترقیاتی کمشنر پلوامہ ڈاکٹر رگھو لنکر نے آج ایڈیشنل ڈپٹی کمشنر ترال اور دیگر عہدیداروں کے ہمراہ نی بگ کا دورہ کیا اور وہاں صورتحال کا جائزہ لیا۔

اس موقع میڈیا کے ساتھ گفتگو کرتے ہوئے ضلع ترقیاتی کمشنر نے بتایا کہ کورونا وائرس کو مزید پھیلنے سے روکنے کے لیے پورے ریڈ زون علاقے میں سیمپلنگ کا آغاز کیا گیا ہے اور پورے گاؤں میں جراثیم کش ادویات کا چھڑکاؤ کیا جائے گا۔