وسطی کشمیر کے ضلع بڈگام میں گذشتہ شام دیر گئے تحصیل بیروہ کے رٹھسن اور درگر گاؤں کو فوج نے محاصرے میں لیا اور تلاشی کارروائی عمل میں لائی۔
بڈگام پولیس کے ساتھ 53 آر آر ،ایس او جی اور 2 آر آر نے مشترکہ طور پر رٹھسن اور درگر گاؤں کا محاصرہ کیا اور گھر گھر تلاشی شروع کی۔
فوج کو مصدقہ ذرائع نے اطلاع دی تھی کہ اس علاقے میں عسکریت پسند چھپے ہوئے ہیں جس کی بنا پر یہ کارروائی عمل میں لائی گئی۔
فوج نے مذکورہ گاؤں سے نکلنے والے تمام راستوں کو سیل کر دیا اور کسی بھی ناخوشگوار واقعے سے نمٹنے کے لیے فوج کی بڑی تعداد کی نفری کو یہاں تعینات کیا گیا۔
مقامی باشندوں کا کہنا ہے کہ شام کے بعد ہی فوج کی موجودگی دیکھ کر لوگ گھروں میں محصور ہو کر رہ گئے۔ آخری اطلاع ملنے تک محاصرہ اور تلاشی کارروائی جاری تھی۔
