سرینگر انتظامیہ کا کہنا ہے کہ تمام تعلیمی اداروں کو یہ اطلاع دی جارہی ہے کہ جموں و کشمیر کی خصوصی آئینی حیثیت کے خاتمے کے بعد وادی کی موجودہ صورتحال کے دوران اسکول بند رہنے کے سب بس فیس معاف کر دی گئی ہے۔
سرینگر انتظامیہ کی جانب سے یہ بھی کہا گیا ہے کہ اسکول کے طلباء اور ان کے والدین ایس ڈی ایم ایسٹ ڈی سی آفس سرینگر میں رابطہ کرسکتے ہیں تاکہ اس سلسلے میں درپیش کسی بھی مشکلات کی اطلاع دی جاسکے۔
قابل ذکر ہے کہ ڈویژنل کمشنر کشمیر بصیر احمد خان کی جانب سے اسکول بس فیس معاف کرنے کے سلسلے میں ہدایات رواں ماہ 12 اکتوبر کو جاری کی گئیں۔
واضح رہے کہ وادی میں پانچ اگست سے تعلیمی سرگرمیاں مسلسل معطل ہیں اگرچہ انتظامیہ نے تعلیمی اداروں کے کھلنے کے اعلانات کئے ہیں لیکن اسکولوں اور کالجوں میں درس وتدریس کا سلسلہ بند ہے، عملہ تو حاضر رہتا ہے لیکن اسکولوں سے لے کر کالجوں تک طلبا کہیں نظر نہیں آتے ہیں۔
بتادیں کہ مرکزی حکومت کی طرف سے پانچ اگست کو جموں کشمیر کو خصوصی درجہ عطا کرنے والی آئین ہند کی دفعہ 370 اور دفعہ 35 اے کو منسوخ اور ریاست کو مرکز کے زیر انتظام دو علاقوں جموں و کشمیر اور لداخ میں تقسیم کرنے کا اعلان کیا گیا۔ ریاست کی تقسیم 31 اکتوبر سے نافذالعمل ہوگی۔
