عام بجٹ سے قبل ٹریڈ یونین لیڈر سے ای ٹی وی بھارت کی ملاقات

وادی کشمیر کی معشیت اس وقت نازک موڑ سے گزر رہی ہے اور اس کو پٹری پر لانے کے لیے کاغذی گھوڑے دوڑانے کی ضرورت نہیں ہے بلکہ عملی طور سے اور زمینی سطح پر ٹھوس اور کارگر اقدامات اٹھانے کی اشد ضرورت ہے۔

ان باتوں کا اظہار بٹہ مالو ٹریڈرز ایسوسی ایشن کے صدر ابرار احمد خان نے ای ٹی وی بھارت کے ساتھ بات چیت کے دوران کیا۔

ابرار احمد خان نے کہا کہ' رواں ماہ یکم فروری کو پیش ہونے والے عام بجٹ میں وادی کشمیر کی متاثر ہوچکی معیشت کے لیے تاجر پیشہ افراد کے لیے خاص پیکج ہونا چاہیے تاکہ چھوٹے سے لے کر بڑا تاجر بھی اپنا کاروبار پھر سے بہتر ڈھنگ سے شروع کر پائے ۔'

ایک سوال کے جواب میں ایسو سی ایشن کے صدر نے کہا کہ ' اگرچہ پچھلے برس کے بجٹ میں بھی تاجر برادری اور جموں و کشمیر کی معیشت کو بہتری کی طرف گامزن کرنے کے لیے حکومت کی جانب سے کئی اعلانات کئے گئے لیکن عملی طور اس پر ابھی تک اس پر خاطر خواہ عمل نہیں کیا گیا۔

انہوں نے کہا گزشتہ 5 ماہ سے جس غیر یقینی صورتحال سے تجارت پیشہ افراد گزر رہے وہ کافی تکلیف دہ ہے جس کے لیے مرکزی حکومت کو اپنے سالانہ بجٹ میں خاص خیال رکھنا چاہیے۔

نمائندے کے ایک سوال کے جواب میں ابرار احمد خان نے کہا کہ ' گزشتہ پانچ ماہ سے تاجر بینک کے قرضہ جات کی اپنی ماہانہ قسط ادا نہیں کر پائے ہیں وہیں بینک بھی آج کی تاریخ میں تجارت پیشہ افراد کو قرض دینے کے لیے اپنا ہاتھ پیچھے کھینچ رہے ہیں جس پر بھی مرکز کو عام بجٹ میں خاص خیال رکھتے ہوئے رعایت دینی چاہیے تاکہ وادی کشمیر کی تجارت کو گزشتہ سال 5 اگست سے پہلے کی ہیئت پر کم ازکم بحال کیا جاسکے۔'

ٹریڈ لیڈر نے کہا کہ اس بجٹ سے اگرچہ انہیں کافی امیدیں وابستہ ہیں تاہم انہوں نے مطالبہ کیا کہ جیلوں میں بند تمام تاجر لیڈران کو رہا کیا جانا چاہیے۔