بڈگام: مرکز کے زیر انتظام جموں و کشمیر کے ضلع بڈگام میں واقع خان صاحب تھانے کی پولیس نے خفیہ اطلاع کی بنیاد پر علاقے میں خصوصی تلاشی مہم کے دوران تین افراد کو گرفتار کرکے ان کے پاس سے سونے کی نقلی بسکٹوں سے بھرا بیگ برآمد کیا۔ بڈگام پولیس کو نقلی سونے کے بسکٹوں کا غیر قانونی کاروبار کی اطلاع کے ملنے پر فورا کارروائی کرتے ہوئے ایک ٹیم نے گوگجہ پتھری کراسنگ کے قریب ایک مشتبہ گاڈی کو روکا، جس کا رجسٹریشن نمبر JK04F/5047 ہے۔ اس گاڑی میں 03 افراد سوار تھے جن کی شناخت فیاض احمد ڈار ولد عبدالاحد ڈار ساکن مالوہ کنزر، فاروق احمد ڈار ولد ولد غلام محمد ڈار ساکن آریزال (خانصاحب) اور شبیر احمد ڈار ولد جلال الدین ڈار ساکن آریزال (خانصاحب) کے طور پر ہوئی ہے۔
یہ بھی پڑھیں: این آڈی ٹی سرینگر میں قبل از وقت سرمائی چھٹیوں کا اعلان
ان افراد کی ذاتی تلاشی کے بعد جب گاڑی کی تلاشی لی گئی تو دوران تلاشی پولیس کو 239 سونے نما بسکٹ برآمد ہوئے جن کے جعلی ہونے کا شبہ تھا۔ جب موقعے پر ملزمان سے متعلقہ اشیاء (سونے نما بسکٹ) کے بارے پوچھ گچھ کئی گئی تو وہ اس کی تصدیق نہ کر سکے جس کے بعد انہیں موقع پر ہی گرفتار کر لیا گیا۔ پولیس نے ملزمین کے خلاف متعلقہ دفعات کے تحت کیس درج کر کے تحقیقات شروع کر دی ہے۔
