جنوبی کشمیر کے ضلع شوپیاں میں بی جے پی کے ایک پنچ اور اسکے ساتھی پر ایک خاتون نے اغوا کے بعد ریپ کرنے کا الزام عائد کرتے ہوئے پولیس اسٹیشن میں ایف آئی آر درج کرائی ہے۔
ذرائع کے مطابق شوپیاں ضلع کے چک عمشی پورہ علاقے کے بی جے پی پنچ لطیف جگل اور اسکے ساتھی نے 5 جون کو آڑبل ریشی نگری سے ایک شادی شدہ خاتون کو اغوا کر لیا جسکے بعد ان دونوں نے دو روز تک اس خاتون کو اغوا کرکے رکھا اور اسکی عصمت دری کی۔
مقامی خبررساں ایجنسی کے مطابق ایک خاتون نے پولیس اسٹیشن ہیرپورہ شوپیاں میں شکایت درج کرائی جس میں اس خاتون نے بتایا کہ بی جے پی کے ایک پنچ لطیف جگل نے اپنے ساتھیوں سمیت اسے اغوا کرنے کے بعد دو روز تک جنسی زیادتی کی جسکے بعد اس خاتون کو چھوڑا گیا۔
پولیس کا حوالہ دیتے ہوئے مقامی خبر رساں ایجنسی نے لکھا پولیس نے خاتون کی شکایت پر کیس ایف آئی آر نمبر -30/2020 u/s 366, 109,376 درج کرکے تحقیقات شروع کردی ہیں۔
اس سلسلے میں ابھی تک چار افراد کی گرفتاری عمل میں لائی گئی ہے جبکہ پنچ لطیف جگل کی تلاش جاری ہے۔
پولیس پارٹی جب اس پنچ کے گھر اسے گرفتار کرنے کی غرض سے پہنچی تو وہاں تالا لگا تھا لیکن گھرمیں کوئی نہیں تھا اور اسے ڈھونڈ نکالنے کی کوششیں جاری ہے۔
