جموں و کشمیر: طلبا کی بہتر تعلیم کے لیے فوج کی پہل

اندرانی بالن فاؤنڈیشن بارہمولہ اور کپواڑہ اضلاع میں اوڑی، وائینی، تریگام اور حاجنار کے چار آرمی گڈ ول اسکولوں کو مالی اعانت فراہم کرے گی۔

بھارتی فوج کے چنار کور نے وادی کشمیر کے نوجوانوں کو بہتر تعلیم کی سہولیات فراہم کرنے کے لیے پونے میں واقع اندرانی بالن فاؤنڈیشن کے ساتھ مفاہمت نامہ پر دستخط کیا۔

اس ایم او یو (مفاہمت نامہ) کے ذریعے آرمی گڈ ول اسکولوں اور پریوار اسکول سوسائٹی کو مالی اعانت ملے گی۔

اس تقریب کی صدارت چنار کور کے کمانڈر لیفٹیننٹ جنرل بی ایس راجو کے ہمراہ اندرانی بالن فاؤنڈیشن کے ٹرسٹی پنیت بالن اور جہنوی دھاری وال نے کی۔

اندرانی بالن فاؤنڈیشن بارہمولہ اور کپواڑہ اضلاع میں اوڑی، وائینی، تریگام اور حاجنار کے چار آرمی گڈ ول اسکولوں کو مالی اعانت فراہم کرے گی۔ یہ بارہمولہ میں جسمانی طور معذور بچوں کے لیے پریوار اسکول سوسائٹی کے لئے بنیادی ڈھانچہ بھی تیار کرے گی۔

لیفٹیننٹ جنرل نے بتایا کہ ' آج کا دن ایک بہت اہم تاریخ کا دن ہے جس میں ہم نے آرمی گڈ ول اسکولوں اور پریوار اسکول کو چلانے کے لیے مالی اعانت کے لئے اندرانی بالن فاؤنڈیشن کے ساتھ ایک ایم او یو پر دستخط کیے ہیں۔'

راجو نے کہا کہ 'ہم اندرانی بالن فاؤنڈیشن کے شکر گزار ہیں کہ انہوں نے آگے بڑھ کر پہل کی۔'

انہوں نے مزید کہا کہ 'یہ فاؤنڈیشن کی جانب سے ایک بہتریں قدم ہے جس میں وہ فوج کے ساتھ تعاون کرنے آئے ہیں تاکہ کشمیر کے مقامی طلبا کو معیاری تعلیم تک رسائی حاصل ہوں۔'

چنار کور اس وقت کشمیر میں 28 آرمی گڈ ول اسکولیں چلارہا ہے جو ہر سال 10000 سے زائد طلبا کو تعلیم فراہم کر رہا ہے۔ ان اداروں میں سے تقریبا ایک لاکھ طلبا کامیاب ہو چکے ہیں۔