پوری وادی کی طرح جنوبی کشمیر میں بھی آج معمولات زندگی متاثر رہیں۔ انتظامیہ کی جانب سے آج اونتی پورہ، ترال اور پامپور علاقوں میں سخت بندشیں عائد کی تھیں جبکہ عام لوگوں کو بلا ضرورت اپنے گھروں سے نکلنے کی اجازت نہیں دی جا رہی تھی۔
زبردست بارش کے باوجود سرینگر جموں قومی شاہراہ پر ناکے لگائے گیے تھے جہاں گاڑیوں کی باریک بینی سے تلاشی لی جا رہی تھی اور صرف ایمرجنسی سروسز کے تحت آنے والے افراد کو ہی آنے جانے کی اجازت دی جا رہی تھی۔
ایس ایس پی اونتی پورہ طاہر سلیم نے پولیس ڈسٹرکٹ اونتی پورہ کی حدود میں آنے والے عوام سے اپیل کی ہے کہ وہ اپنے گھروں کے اندر رہے اور بغیر اسکریننگ کے غیر ریاستی مزدوروں کو اپنے گھر میں پناہ دینے سے گریز کریں۔
واضح رہے گزشتہ روز ترال پولیس نے ھردومیر گاؤں میں رہنے والے ارشد حسین ڈار نامی ایک شہری کو بغیر اسکریننگ غیر ریاستی مزدوروں کو اپنے گھر میں پناہ دینے پر گرفتار کیا گیا تھا۔ عوامی حلقوں نے پولیس کی جانب سے کیے جا رہے اقدامات کو سراہا ہے۔
