مرکز کے زیر انتظام جموں و کشمیر میں امرناتھ یاترا کی تیاریاں اور اس کے انعقاد سے متعلق آج جموں میں انتظامیہ اور شری امرناتھ شرائن بورڈ کی ایک اہم میٹنگ ہونی ہے۔
ذرائع کے مطابق ' میٹنگ میں جموں و کشمیر انتظامیہ کے سینئیر افسران کے علاوہ شرائن بورڈ کے سی ای او بپُل پھاٹک اور کچھ سینئیر پولیس افسران بھی موجود ہونگے۔ میٹنگ کے دوران یاترا کی تیاریوں، انعقاد اور حفاظتی اقدامات کے حوالے سے فیصلہ لیا جائے گا۔ یہ میٹنگ آج سہ پہر تقریباً تین بجے ہونی متوقع ہے۔"
قابل ذکر ہے کہ شرائن بورڈ یاترا کے انعقاد کے حوالے سے پہلے ہی فیصلہ کر چکا ہے تاہم انتظامیہ میں تال میل کے فقدان کی وجہ سے حتمی فیصلہ ابھی تک نہیں ہوپایا ہے۔
ڈویزنل کمشنر کشمیر نے حال ہی میں ای ٹی وی بھارت کو ایک انٹرویو میں بتایا کہ ' یاترا کے انعقاد کے سلسلے میں حتمی فیصلہ لیا جانا باقی ہے'۔
یہ بھی پڑھیں
کشمیر میں کووڈ 19 سے مزید چار اموات
وہیں انتظامیہ کے ترجمان روہت کنسل کا کہنا ہے کہ "یاترا کے انعقاد کے تعلق سے تمام فیصلے بورڈ ہی لیتا ہے اور آج کی میٹنگ کے بعد سب کچھ واضح ہو جائے گا۔"
عالمی وبا کورونا وائرس کے سبب امسال سالانہ امرناتھ یاترا 21 جولائی سے شروع ہوگی اور اگست کی تین تاریخ کو اختتام پذیر ہوگی۔ عمومی طور پر دو ماہ تک جاری رہنے والی امرناتھ یاترا میں لاکھوں یاتری حصہ لیتے تھے۔
انتظامیہ کی جانب سے کورونا وائرس کے سبب امسال روزانہ صرف 500 یاتریوں کو مقدس گپھا میں جانے کی اجازت دی جائے گی۔
واضح رہے کہ گزشتہ برس بی جے پی حکومت کی جانب سے دفعہ 370 کے خاتمے سے قبل ہی یاترا کو اچانک منسوخ کر دیا گیا تھا۔ منسوخی سے قبل تین لاکھ سے زائد یاتریوں نے سطح سمندر سے 12 ہزار 756 فِٹ اونچی گپھا کی زیارت کی تھی۔
