کووڈ مثبت حاملہ خواتین کی بڑھتی تعداد کے مد نظر ضلع انتظامیہ نے سرنل میں واقع جان بشپ ہسپتال کو اُن حاملہ خواتین کے لیے مخصوص رکھا ہے جن کا کورونا ٹیسٹ مثبت پایا گیا ہو۔
بیس بیڈ والے ہسپتال میں آپریشن تھیٹر، لیبر روم کے علاوہ حاملہ خواتین کے لیے تمام ضروری سہولیات میسر ہیں۔
واضح رہے کہ چند روز قبل جان بشپ ہسپتال کے عملہ کے کئی افراد کورونا مثبت پائے گئے تھے جس کے بعد انہیں قرنطینہ میں رکھا گیا۔
تاہم ضلع انتظامیہ نے ہسپتال میں باقی دیگر نجی اسٹاف کے ساتھ سرکاری عملہ تعینات کرکے اسے حاملہ خواتین کی سہولت کے استعمال میں لانے کی ہدایت دی ہے تاکہ کورونا وائرس کی زد میں آنے والی حاملہ خواتین کو کسی مشکلات کا سامنا نہ کرنا پڑے۔
ہسپتال کو فلحال ایک ماہ کی سرکاری تحویل میں لیا گیا ہے۔
ذرائع کے مطابق ضلع اننت ناگ میں 900 ایسی حاملہ خواتین ہیں جن کے زچگی کا وقت تقریباً رواں ماہ میں ہی متوقع ہے۔
ان حاملہ خواتین میں سے 62 کوویڈ ٹیسٹ مثبت پایا گیا ہے جبکہ 22 صحتیاب ہو گئی ہیں۔
قابل ذکر ہے کہ جاری وبائی صورتحال کے دوران ، جنوبی کشمیر کے ضلع اننت ناگ میں کوویڈ کے سبب دو حاملہ خواتین پہلے ہی دم توڈ چکی ہیں۔
