جموں و کشمیر کے تقریبا 250 باشندوں کا ایک گروپ امرتسر میں اٹاری واگھہ بارڈر کے راستے وطن واپس آیا ہے۔
ایس ڈی ایم -2 امرتسر شیو راج سنگھ بل نے نامہ نگاروں سے بات کرتے ہوئے کہا کہ ' 748 بھارتی شہریوں نے ملک میں واپس آنے کے لیے اندراج کرایا ہے جس میں سے مرکزی علاقے جموں و کشمیر کے 250 افراد لوٹ آئے ہیں۔'
انہوں نے مزید کہا کہ ' آج 250 افراد ملک واپس آگئے اور 248 افراد پر مشتمل دوسرا گروپ آج واپس آئے گا۔ یہاں پہنچتے ہی ان کی اسکریننگ کی جائے گی۔'
واضح رہے کہ کورونا وائرس کے بحران کی وجہ سے بھارت اور پاکستان نے دوسرے ممالک کی طرح اپنی سرحدوں کو سیل کردیا تھا۔
شیو راج سنگھ نے کہا کہ لاک ڈاؤن میں نرمی کے بعد بھارتی شہری جو لاک ڈاؤن سے پہلے ہی پاکستان گئے تھے اور وہاں پھنسے ہوئے تھے،ان شہریوں میں سے 748 اگلے تین دن میں اٹاری واگھہ بارڈر کے راستے بھارت آئیں گے۔
انہوں نے مزید کہا کہ جموں و کشمیر انتظامیہ نے خصوصی بسیز بھیجی ہے جس میں واپس آئے شہریوں کو مرکزی علاقے کی طرف روانہ کیا جائے گا۔ جب وہ یونین ٹیرٹری میں پہنچیں گے تو انہیں قرنطینہ مراکز میں رکھا جائے گا۔
