سرینگر: نوزائیدہ بچہ کی کورونا سے موت

جموں و کشمیر میں اب تک کورونا وائرس سے مرنے والوں میں یہ سب سے کم عمر مریض ہے۔

سرینگر کے بمینا علاقے سے تعلق رکھنے والے 15 دن کے نوزائیدہ بچے کی جمعہ کے روز کورونا وائرس سے موت ہوگئی ۔

شیر کشمیر انسٹیچیوٹ آف میڈیکل سائنسز صورہ کے میڈیکل سپریٹنڈنٹ ڈاکٹر فاروق نے ای ٹی وی بھارت کو بتایا کہ ' نوزائیدہ بچہ ایروٹک سنٹرز میں مبتلا تھا۔ یہ وہ بیماری ہے جس میں رگوں میں خون کا بہاؤ قلب کا ڈھکن پوری طرح سے نہ کھلنے کی وجہ سے جسم میں خون کا بہاؤ کم رہتا ہے۔

ان کا مزید کہنا تھا کہ ' رواں مہینے کی 16 تاریخ کو اس بچے کو ہسپتال میں داخل کیا گیا تھا جس کے بعد ان کی کورونا وائرس جانچ بھی کی گئی تھی۔ تاہم 17 جون کو ان کا ٹیسٹ کورونا وائرس کے لیے مثبت پایا گیا جس کے بعد ان کا علاج بھی شروع ہوا۔

انہوں نے کہا کہ بڑے دکھ سے کہنا پڑ رہا ہے کہ آج صبح 10:55 ان کی موت واقع ہوگئی۔

قابل ذکر ہے کہ جموں و کشمیر میں مہلک کورونا وائرس سے مرنے والوں کی تعداد 75 پہنچ چکی ہے اور گزشتہ چوبیس گھنٹوں میں 9 مریض اس وائرس کا شکار ہو چکے ہیں۔