منالی: ضلع کلّو میں مسلسل بارش کی وجہ سے مختلف مقامات پر حادثات رونما ہورہے ہیں۔ کبھی بادل پھٹنے سے تو کبھی لینڈ سلائیڈنگ سے لوگوں کو مشکلات کا سامنا کرنا پڑ رہا ہے۔ منالی کے سیاحتی شہر کلو میں بارش کا سلسلہ جاری ہے۔ اس بارش کے درمیان ایک ویڈیو سامنے آیا جس میں دیکھا جا سکتا ہے کہ کس طرح تیز بارش کی وجہ سے اٹل ٹنل تالاب میں تبدیل ہو گئی۔ تاہم اس سے گاڑیوں کی آمد و رفت پر کوئی اثر نہیں پڑا لیکن اس کی ویڈیو سوشل میڈیا پر خوب وائرل ہو رہی ہے۔
واضح رہے کہ اٹل ٹنل روہتانگ دنیا کی سب سے اونچی سرنگ ہے، جو لاہول اور کلو اضلاع کو جوڑتی ہے۔ جب یہ ٹنل بن رہی تھی تو اس وقت بھی سیری نالے کی وجہ سے کافی مسائل پیش آئے تھے۔ اب جمعرات کی رات ہونے والی موسلادھار بارش کی وجہ سے ٹنل کے باہر نالے کے پانی سے تالاب بن گیا اور پانی سرنگ میں بھی داخل ہو گیا۔ اتنا ہی نہیں ٹنل کی دیواروں سے بھی پانی کا رساؤ ہو رہا تھا۔ تاہم یہ پانی کچھ ہی دیر میں باہر نکل گیا تھا اور یہاں سے گاڑیوں کی آمدورفت مسلسل جاری ہے۔
ایس پی لاہول سپتی مانو ورما نے بتایا کہ لاہول وادی میں بارش کا سلسلہ جاری ہے اور مختلف مقامات پر مٹی کے تودے گرنے کا خدشہ ہے۔ انہوں نے بتایا کہ گزشتہ روز بھی ٹنڈی کلاڈ روڈ پر لینڈ سلائیڈنگ ہوئی تھی۔ لیکن اب اسے کھول دیا گیا ہے اور یہاں سے گاڑیوں کی آمدورفت جاری ہے۔ انہوں نے لوگوں اور سیاحوں پر زور دیا کہ وہ موسمی حالات کو مدنظر رکھتے ہوئے وادی لاہول کا رخ کریں۔
