شملہ: شمالی ہندوستان میں آنے والے زلزلے کے جھٹکے ہماچل پردیش میں بھی محسوس کیے گئے۔ صبح 10:17 بجے کے قریب ریاست کے مختلف حصوں میں لوگوں نے زلزلے کے جھٹکے محسوس کئے۔ جس کی وجہ سے کئی مقامات پر لوگ گھروں سے باہر نکل آئے۔ بدی، نالہ گڑھ اور نہان سمیت دیگر علاقوں میں زلزلے سے زمین کئی سیکنڈ تک لرز اٹھی۔ لوگوں نے اپنے گھروں میں رکھی چیزوں کو ہلتا ہوا دیکھا۔ زلزلے کے ان جھٹکوں کے باعث لوگوں میں خوف و ہراس کا ماحول ہے۔ خوش قسمتی سے زلزلے کی وجہ سے کہیں سے بھی جانی و مالی نقصان کی اطلاع نہیں ملی ہے۔ اس کے ساتھ ہی کئی مقامات پر لوگ اپنے گھروں سے باہر نکل آئے ۔
موسمیاتی مرکز شملہ کے ڈائریکٹر سریندر پال نے بتایا کہ ہماچل کے کچھ حصوں میں زلزلے کے جھٹکے محسوس کیے گئے ہیں۔ ریکٹر اسکیل پر اس کی شدت 2.8 تھی۔ ریاستی ڈیزاسٹر مینجمنٹ اتھارٹی سے موصولہ اطلاع کے مطابق زلزلے کی وجہ سے ریاست میں جان و مال کے نقصان کی کوئی اطلاع نہیں ہے۔ واضح رہے کہ ہماچل پردیش زلزلے کے نقطہ نظر سے بہت حساس ہے۔ خاص طور پر چمبا، کانگڑا اور منڈی اضلاع انتہائی حساس زون 4 اور 5 میں شامل ہیں۔ سنہ 1905 میں چمبا اور کانگڑا اضلاع میں آنے والے تباہ کن زلزلے کی وجہ سے 10 ہزار سے زائد افراد ہلاک ہوئے تھے۔ چمبا اور اس کے آس پاس کے علاقے گزشتہ کئی سالوں سے مسلسل زلزلے کی زد میں ہیں، جس کی وجہ سے لوگ خوفزدہ ہیں۔
یہ بھی پڑھیں: Earthquake In Delhi NCR دہلی این سی آر سمیت کئی ریاستوں میں زلزلے کے جھٹکے
یواین آئی
