شملہ: ہماچل پردیش میں مانسون 24 جون کو پہنچ گیا۔ موسلادھار بارش کے باعث اب تک 9 افراد ہلاک جب کہ 14 زخمی ہوچکے ہیں۔ چار مکانات مکمل طور پر تباہ جبکہ 28 کو جزوی نقصان پہنچا۔ پرنسپل سکریٹری ریونیو اور ڈیزاسٹر مینجمنٹ اونکار چند شرما نے بتایا کہ نقصان کا تخمینہ لگ بھگ 104 کروڑ روپے ہے۔ بادل پھٹنے کا واقعہ رام پور سب ڈویژن کے تحت پندھرابیس علاقہ کے سرپارہ پنچایت کے سوگہ میں سامنے آیا ہے۔ بادل پھٹنے سے آنے والے سیلاب میں کئی لوگوں کی قابل کاشت زمینیں بہہ گئی ہی، جب کہ ایک گوشالہ آرا مل مشین شیڈ بھی سیلاب کی لپیٹ میں آ گیا ہے۔
اس کے علاوہ رام پور-سرپارہ سڑک بھی سیلاب کی وجہ سے چار مقامات پر بند ہوگئی ہے، جبکہ 14 میگاواٹ کے گرینکو پروجیکٹ کی پین اسٹاک لائن کو بھی نقصان پہنچا ہے۔ دوسری جانب بادل پھٹنے کی اطلاع ملتے ہی محکمہ ریونیو کی ٹیم نے موقع پر پہنچ کر نقصان کا جائزہ لیا۔ مقامی پنچایت کے نائب سربراہ سی ایل نیگی نے کہا کہ بادل پھٹنے کے واقعہ میں کوئی جانی نقصان نہیں ہوا ہے لیکن لوگوں کی کئی بیگھہ قابل کاشت زمین سیلاب میں بہہ گئی ہے۔
منڈی، شملہ اور سولن میں دو دو، چمبہ، ہمیر پور اور کلو میں ایک ایک شخص کی موت ہوئی۔ سیلاب اور سڑک حادثات میں تین افراد جان سے ہاتھ دھو بیٹھے، دو کھائی میں گرنے سے اور ایک لینڈ سلائیڈنگ سے۔ مون سون کی بارشوں سے چار مکانات مکمل طور پر تباہ جبکہ 28 مکانات کو جزوی نقصان پہنچا۔ جانوروں کے 16 شیڈ بھی تباہ کیے گئے جہاں 312 مویشی ہلاک ہوئے۔ گزشتہ 48 گھنٹوں کے دوران لینڈ سلائیڈنگ کے سات، سیلاب کے چار اور بادل پھٹنے کے ایک واقعات سامنے آئے۔
موسمیاتی مرکز شملہ کے سائنسدان سندیپ کمار شرما نے بتایا کہ ریاست میں اگلے 5 دنوں تک بارش کا امکان ہے۔ بعض مقامات پر موسلادھار بارش کا الرٹ جاری ہے۔ آج کے لیے اورنج الرٹ اور کل کے لیے یلو الرٹ جاری کر دیا گیا ہے۔ جون میں اوسط سے زیادہ بارش کا امکان ہے۔ چار قومی شاہراہیں اور 301 سڑکیں وسیع بارش کی وجہ سے بند ہیں، اتھارٹی کی رپورٹ کے مطابق منڈی زون میں 97، شملہ زون میں 71، ہمیر پور زون میں 65 اور محکمہ تعمیرات عامہ کے کانگڑا زون میں 64 سڑکیں بند ہیں۔ اس کے علاوہ نیشنل ہائی وے اتھارٹی کے شملہ اور شاہ پور میں دو قومی شاہراہیں بھی لینڈ سلائیڈنگ سے بند ہیں۔
مانسون کی بارش کی وجہ سے ریاست میں پینے کے پانی کی 842 اسکیمیں بند کردی گئی ہیں۔ جل شکتی محکمہ کے چمبا سرکل میں زیادہ سے زیادہ 278، دھرم شالہ سرکل میں 135، سندر نگر میں 98، سولن میں 90، نہان میں 80، شملہ میں 64، دھرم پور میں 45، کولو میں 21، ریکانگ پیو میں 15 اور بلاسپور میں 10 پینے کے پانی کی اسکیم ہیں۔ محکمہ موسمیات کے مطابق گزشتہ 24 گھنٹوں کے دوران دھرم شالہ میں سب سے زیادہ 106 ملی میٹر بارش ہوئی ہے۔ اس کے علاوہ منڈی میں 56 ملی میٹر، پاونٹا صاحب میں 43، پالم پور میں 32، چمبہ میں 24، کانگڑا میں 15 اور دھولکوان میں 12 ملی میٹر بارش ہوئی ہے۔ بادل چھائے رہنے سے درجہ حرارت میں کمی سے موسم خوشگوار ہوگیا ہے۔ ریاست کا اوسط کم از کم درجہ حرارت معمول سے 0.1 ڈگری کم ریکارڈ کیا گیا ہے۔
مزید پڑھیں:
یو این آئی
