میوات: نہر ٹوٹنے سے سیلاب جیسی صورتحال

گاؤں کے سرپنچ نے انتظامیہ پر الزام لگاتے ہوئے کہا کہ 'جب ہمیں پانی کی ضرورت ہوتی ہے تو ہمارے لئے پانی مہیا نہیں کرایا جاتا ہے اور اب جبکہ بارش سے کھیت سیراب ہو چکے ہیں تو نہر میں پانی  چھوڑا جارہا ہے۔ آخر اس کے پیچھے کی وجہ کیا ہے؟'

ریاست ہریانہ کے ضلع نوح میوات کے پلہ گاؤں میں نہر ٹوٹنے کی وجہ سے سیلاب جیسا نظارا ہو گیا ہے۔ مقامی لوگوں کو کافی مشکلات کا سامنا کرنا پڑ رہا ہے۔ کئی گھر پانی میں ڈوب چکے ہیں۔ وہیں کچھ گھروں کی دیواریں ٹوٹ چکی ہیں۔

ای ٹی وی بھارت سے بات کرتے ہوئے مقامی لوگوں نے بتایا کہ 'یہ نہر کل رات 11:00 بجے ٹوٹی تھی۔ ہم نے پانی روکنے کی پوری کوشش کی مگر کامیاب نہ ہوسکے۔'

ضلع انتظامیہ پر الزام لگاتے ہوئے مقامی لوگوں نے کہا کہ 'اطلاعات کے باوجود رات میں کوئی بھی ہماری مدد کو نہ پہنچا۔'

گاؤں والوں کا ایک الزام یہ بھی ہے کہ 'جب ہمارے کھیت سوکھ رہے ہوتے ہیں اور ہمیں پانی کی ضرورت ہوتی ہے تب ہمارے لئے پانی نہیں چھوڑا جاتا ہے اور اب جب بارش ہو رہی ہے تو نہر میں پانی چھوڑا گیا ہے۔'

مقامی لوگوں کا کہنا ہے کہ 'یہ نہر دو بار پہلے بھی ٹوٹ چکی ہے اور ایک بچہ ڈوب کر اس نہر میں مر چکا ہے۔ لیکن اس پر محکمہ کی کوئی نظر نہیں ہے۔'

وہیں گہبر گاؤں کے سرپنچ نے بھی الزام لگایا ہے کہ جب ہمیں پانی کی ضرورت ہوتی ہے تو ہمارے لئے پانی مہیہ نہیں کرایا جاتا ہے اور اب جبکہ بارش سے کھیت سیراب ہو چکے ہیں تو نہر میں پانی چھوڑا جارہا ہے۔ آخر اس کے پیچھے کی وجہ کیا ہے؟'