کورونا وائرس کے تئیں بیداری کے تعلق سے سرسا کے ایک نئے شادی شدہ جوڑے نے اچھی پہل کی ہے۔ سنیچر دیر شام کو سرسا کے ہسپتال میں اچانک ایک پھولوں سے سجی کار پہنچی، تو ہر کوئی جھانک کر یہ دیکھنے کی کوشش کرنے لگا کہ آخر کون آیا۔
اس گاڑی میں ایک نیا شادی شدہ جوڑا تھا۔ یہ جوڑا پنجاب سے شادی کر کے آیا تھا اور اپنے گھر نہ جا کر ہسپتال کورونا کا ٹیسٹ کرانے کے لیے پہنچ گیا۔ سرسا سے چند لوگ ضلع انتظامیہ سے اجازت لے کر پنجاب جا کر دلہن کو ودا کرا لائے تھے۔
شادی کر کے لوٹے جوڑے نے گھر نہ جا کر کورونا کے ٹیسٹ کے لیے ہسپتال کا رخ کیا۔ یہاں دولہا اور دولہن کا ٹیسٹ کرایا گیا۔ سرسا کے ہسپتال کے سی ایم او ڈاکٹر سریندر نے بتایا کہ 'ہسپتال میں دولہا دولہن پہنچے تھے اور انہوں نے کورونا ٹیسٹ کرایا ہے۔ ایسے ہی اگر کوئی سفر کر کے آیا ہو تو آگے آئے اور کورونا ٹیسٹ کرائے۔ کورونا کو شکست دینے کے لیے سب کو ایسے ہی بیدار رہنے کی ضرورت ہے'۔
