ریاست ہریانہ کے ضلع حصار کے ہانسی میں ہڈا سیکٹر 5 سے شروع ہوکر ٹریکٹر یاترا نئی کچہری چوک، شری کالی دیوی چوک، بس اسٹینڈ، امبیڈکر چوک، جاٹ دھرم شالا، حصار چنگی، تکونا پارک، چار قطب گیٹ سے ہوتی ہوئی سِسائے پل پر ختم ہوئی۔
ٹریکٹر یاترا میں ڈپٹی اسپیکر رنبیر گنگوا، حصار لوک سبھا حلقہ کے رکن پارلیمان برجیندر سنگھ، راجیہ سبھا ممبر جنرل ڈی پی وتس، حصار کے رکن اسمبلی کمل گپتا، ہانسی کے ممبر اسمبلی کے ونود بھایانہ، بی جے پی کے ضلعی صدر کیپٹن بھوپندر وغیرہ شامل ہوئے۔
اس موقع پر بی جے پی رہنماؤں نے دعوی کیا کہ زرعی قوانین کسانوں کے مفاد میں ہیں۔ مقررین نے کانگریس پر کسانوں کو گمراہ کرنے کے الزام دہراتے ہوئے کہا کہ کانگریس رہنما کسانوں کو کم از کم امدادی قیمت (ایم ایس پی) کے نام پر ورغلانے کی کوشش کر رہے ہیں، جب کہ وزیر اعظم نے خود یقین دہانی کرائی ہے کہ ایم ایس پی جاری رہے گی۔
اسی دوران منڈی تاجروں نے آڑھتی ایسوسی ایشن کے ریاستی ترجمان رام اوتار تائل اور عام آدمی پارٹی کے رہنما اور ضلع کونسلر منوج راٹھی کی قیادت میں جند روڈ اور سیسائی پل پر ٹریکٹر یاترا کو کالے جھنڈے دکھانے کی کوشش کی، لیکن پولیس انتظامیہ کی مستعدی کے سبب وہ کامیاب نہیں ہوسکے۔ پولیس انتظامیہ نے مظاہرین کو راستے میں روک لیا اور ٹریکٹر یاترا ختم ہونے کے بعد انہیں چھوڑ دیا گیا۔
