پولیس نے بتایا کہ خفیہ اطلاع کی بنیاد پر احمدآباد کے نروڈا علاقے میں کرائم برانچ کی ٹیم نے جی آئی ڈی سی فیس 2 میں واقع نیو سمراٹ نمکین پرائیویٹ لیمیٹیڈ کے کارخانے پر آج صبح چھاپہ مارنے کی کارروائی کی۔
اس دوران کارخانے کے ایک کمرے اور اس کے باہر کھڑے لوڈنگ رکشہ سے 348پیٹی غیر قانونی شراب کی بوتلیں ضبط کرلی گئیں۔ضبط شراب کی قیمت12لاکھ 52ہزار روپے ہونے کا اندازہ ہے۔
ایک دیگر واقعہ میں بناس کانٹھا ضلع کے امیرگڑھ علاقے میں جانچ چوکی پر تلاشی کے دوران دو ٹرکوں سے 48لاکھ 74ہزار 400روپے کی قیمت کی 12ہزار 456 غیر قانونی شراب کی بوتلوں کے ساتھ تین افراد کو بدھ کی شام پکڑ لیاگیا۔
اسی طرح راجکوٹ شہر کے کواڈوا علاقے کے کچیادن گاؤں کے نزدیک ایک گودام سے 21لاکھ 42ہزار 480روپے کی قیمت کی غیر قانونی شراب کی پانچ ہزار 544بوتلیں برآمد کرکے بدھ کی دیر رات پانچ لوگوں کو پکڑ لیاگیا۔پولیس نے معاملہ درج کرکے ضروری کارروائی شروع کردی ہے۔
