قومی دارالحکومت دہلی کے وزیراعلیٰ اروند کیجریوال نے کورونا وائرس کے پیش نظر 50 سے زائد افراد کے اجتماع پر روک لگا دی ہے جبکہ شاہین باغ میں متنازع شہریت ترمیمی قانون کے خلاف مظاہرے جاری ہیں، جہاں سینکڑوں خواتین نے دہلی حکومت کے فیصلہ کو تسلیم کرنے سے انکار کر دیا ہے۔
ای ٹی وی بھارت نے شاہین باغ کے مظاہرہ کے مقام پر پہنچ کر دیکھا تو اندازہ ہوا کہ 150 سے زائد خواتین مظاہرہ میں شامل ہیں اور ایک ساتھ بیٹھی ہوئی ہیں۔
ایسے حالات میں جبکہ ملک بھر میں کورونا وائرس پھیلنے کا اندیشہ ہے۔ تاہم یہاں کی خواتین مظاہرہ ختم کرنے سے منع کر رہی ہیں۔
ان خواتین کا کہنا ہے کہ زیادہ تر مظاہرین برقع پہنتی ہیں جس سے ان کے منہ چھپے رہتے ہیں اور نماز کے لیے کئی بار وضو کرتی ہیں، یہ سب احتیاطی تدابیر سمجھی جا سکتی ہیں۔
واضح رہے کہ خاتون مظاہرین میں عمر رسیدہ خواتین بھی شامل ہیں مگر وہ بھی وائرس کے منفی اثرات سے بے پرواہ ہو کر مظاہرہ میں شامل ہیں۔
مظاہرین کے مطابق ان کے لیے کورونا وائرس سے زیادہ بڑا خطرہ مذہبی تعصب پر مبنی وہ قانون ہے جس کے خلاف ان کا مظاہر گزشتہ تین ماہ سے جاری ہے۔
