ریاست گجرات میں ایک طرف کورونا وائرس کے معاملات بڑھتے ہی جارہے ہیں تو دوسری جانب کورونا سے لوگ غریبی اور اقتصادی بحران کا شکار ہوتے نظر آرہے ہیں۔ ایسے میں شہر احمدآباد میں موجود محدث اعظم مشن کی جانب سے اشرفی ٹفن سروس شروع کی گئی ہے جو کورونا بحران کے دوران غریب، بیمار، ضرورت مند لوگوں اور بے سہارا و مجبور لوگوں کو مفت میں ان کے گھر کھانے کا ٹفن پہنچا رہے ہیں۔
اس تعلق سے اشرفی ٹفن سروس کے نگران محمد رضوان اشرفی نے کہا کہ محدث اعظم مشن پورے گجرات اور پورے ملک میں الگ الگ جگہ پر مختلف طریقے سے قوم کی خدمت انجام دے رہا ہے۔ جس کے تحت احمدآباد کے جوہاپورا سرخیز علاقہ کی قوم کے بے سہارا غریب لوگوں کی خدمت کے لیے ایک اہم قدم اٹھاتے ہوئے اشرفی ٹفن سروس شروع کی گئی ہے۔
اس کے علاوہ محدث اعظم مشن کے خرانچی عمران خلیفہ نے کہا کہ اشرفی ٹفن سروس کی شروعات 4 اکتوبر سے کی گئی ہے اور پہلے دن 55 افراد کو ٹفن پپنچایا گیا۔ اب ہر روز 70 سے 80 لوگوں کو کھانا ان کے گھر ہماری ٹیم کے لوگ دے کر آتے ہیں۔ ہم ہر غریب و ضرورت مند کی خدمت کرنا چاہتے ہیں۔ وہ کبھی بھوکے نہ سوئیں، اس لیے انہیں کھانا کھلانے کی خدمات انجام دے رہے ہیں۔
واضح رہے کہ اشرفی ٹفن سروس شروع ہونے سے سرخیز اور جوہاپورا میں رہنے والے غریب اور ضرورت مندوں کو کافی راحت ملی ہے اور اشرفی ٹفن سروس کے ذریعے ٹفن حاصل کر غربا میں خوشی کا ماحول دیکھا جا رہا ہے۔
اس تعلق سے ٹفن حاصل کرنے والی ایک خاتون غریب بزرگ مدینہ بی بی کا کہنا ہے کہ میں بیوہ ہوں، بہت بوڑھی ہو چکی ہوں، کھانا بنا نہیں سکتی، مزودوری کرتی ہوں۔ لیکن جب سے اشرفی ٹفن سروس ہم کو کھانا پہنچا رہے ہیں، تب سے کھانا کھانے اور بنانے سے کافی راحت ملی ہے اور ہم سب بہت خوش ہیں۔
