بھڑوچ کے جھگڑیا علاقہ میں رات 2 بجے کے قریب یو پی ایل 5 کیمیائی فیکٹری میں دھماکہ اتنا زوردار تھا کہ آس پاس کے علاقے میں بھی اس کی آواز تقریبا 10 کلو میٹر تک سنائی دی۔ اگرچہ اس میں دو افراد جائے واقعہ پر ہی ہلاک ہوگئے لیکن ابھی تک پانچ افراد کا پتہ نہیں چل سکا ہے اور ان کی موت کے امکان سے بھی انکار نہیں کیا جاسکتا ہے۔
اس کے علاوہ 26 دیگر کارکن زخمی ہوئے ہیں جن میں سے 11 ابھی بھی اسپتال میں زیر علاج ہیں۔ ہلاک ہونے والوں کی شناخت بھڑوچ کے رہائشی ونراج سنگھ ایس ڈوڈیا اور میہل مہتا کے طور پر ہوئی ہے۔
محکمہ فائر بریگیڈ کے اہلکاروں نے بتایا کہ جھگڑیا جی آئی ڈی سی میں یو پی ایل 5 پلانٹ میں آج رات میں کسی وجہ سے اچانک آگ لگ گئی۔ فائر بریگیڈ کے اہلکار 14 فائر انجنوں کے ساتھ جائے واقعہ پر پہنچ گئے۔ اس نے تقریبا تین گھنٹوں کی سخت محنت کے بعد آج صبح آگ پر قابو پالیا۔
پولیس نے بتایا کہ زخمیوں کو انکلیشور اور بڑودہ کے اسپتالوں میں بھیج دیا گیا ہے۔ واقعہ کی تفصیلی تحقیقات کی جارہی ہیں۔ کمپنی نے بعد میں جاری بیان میں کہا کہ یونٹ 5 جس میں یہ حادثہ پیش آیا وہ 5 فروری سے بوائلر کی سالانہ نگرانی اور جانچ پڑتال کے لئے بند کر دیا گیا تھا۔ واقعہ کے دوران کوئی کیمیائی گیس کا رساو نہیں ہوا۔ واقعہ کی داخلی تفتیش بھی کی جائے گی۔ ہلاک ہونے والون اور زخمیوں کو مناسب معاوضہ دیا جائے گا۔
