احمد آباد کے تولیپ اسٹیٹ میں واقع ٹکسٹائل فیکٹری کے کمیکل گودام میں آتشزدگی کے بعد طاقتور دھماکے ہوئے جس کے بعد گودام کا ایک حصہ گرنے کی وجہ سے 12 افراد ہلاک ہوگئے اور دیگر متعدد افراد زخمی ہوگئے۔
فائر بریگیڈ افسر متھن مستری نے بتایا کہ پیرانہ روڈ پر نانو کاکا کے کپڑے کے دکان میں آج صبح اچانک زبردست آگ لگ گئی۔ پونے بارہ بجے اطلاع ملتے ہی 25 فائربریگیڈ کی گاڑیوں کے ساتھ فائر بریگیڈ کے اہلکار جائے واقع پر پہنچ گئے۔ تقریبا پانچ گھنٹوں کی زبردست مشقت کے بعد آگ پر قابو پایا جاسکا لیکن اس دوران وہاں کیمیکل کے ڈرم میں ہوئے دھماکے سے اردگرد کی تین سے چار فیکٹریوں کی چھت گر گئی جس سے سنگین طور سے کئی لوگ جھلس گئے اور کئی لوگ ملبے میں دب گئے۔
انہوں نے بتایا کہ اس واقعہ میں مجموعی طور سے 17 لوگ زخمی ہوئے۔ سبھی کو ایل جی اسپتال بھیجا گیا ہے۔ چھت کا ملبہ ہٹایا جارہا ہے۔ ملبہ ہٹانے کے بعد ہی پتہ چل سکے گا کہ اندر اور کتنے لوگ دبے ہوئے ہیں۔ پولس نے بتایا کہ واقعہ میں جھلسے اور زخمی نو لوگوں کو ڈاکٹروں نے مردہ قرار دے دیاہے۔ جبکہ اسپتال میں بھرتی آٹھ لوگوں کا علاج کیا جارہا ہے۔ مرنے والوں کی شناخت فی الحال نہیں ہوسکی ہے۔
پیپلاج روڈ پر آتشزدگی کی اطلاع کے بعد فائر فائٹر کا عملہ موقع پر پہنچ گیا اور 14 افراد کو فیکٹری سے محفوظ نکال لیا گیا۔ چیف فائر آفیسر ایم ایف دستور نے نے بتایا کہ ابھی تک آتشزدگی کی وجوہات کا پتہ نہیں چلا ہے۔ انہوں نے کہا کہ حادثہ میں ہوئے تمام زخمیوں کو ایل جی ہسپتال منتقل کیا گیا۔ انہوں نے مزید افراد کے فیکٹری میں پھنسے ہونے کا خدشہ ظاہر کرتے ہوئے کہا کہ کنکریٹ سلیب کو کاٹنے کےلیے مشینری کا استعمال کیا جارہا ہے۔ فائر کنٹروم روم کے ایک اور عہدیدار نے بتایا کہ صبح 11 بجے آگ سے متعلق کال وصول ہوا تھا جس کے بعد 26 فائٹر وائٹر گاڑیوں کو موقع پر بھیجا گیا۔ آتشزدگی کے بعد ہونے والے دھماکہ کی وجہ سے عمارت تباہ ہوگئی۔ عینی شاہدین کے مطابق دھماکہ اتنا شدید تھا کہ فیکٹری کی چھت گرگئی جس میں متعدد افراد کے پھنسے ہونے کا خدشہ ظاہر کیا جارہا ہے۔
وزیراعظم نریندر مودی نے احمد آباد کی ٹکسٹائل فیکٹری میں لگی آگ پر اظہار تعزیت کیا۔ انہوں نے فیکٹری کے گودام میں آتشزدگی کی وجہ سے ہوئے جانی نقصان پر دکھ کا اظہار کیا اور زخمیوں کےلیے دعا کی۔ انہوں نے کہا کہ انتظامیہ کی جانب سے ریسکیو آپریشن انجام دیا جارہا ہے۔
