کورونا وائرس کی وجہ سے لاک ڈاؤن کی معیاد بڑھتی ہی جا رہی ہے، ایسے میں ہر شعبہ متاثر ہوتا نظر آرہا ہے۔ خاص طور سے ریاست گجرات میں احمدآباد میونسپل کارپوریشن کی جانب سے چلنے والی احمدآباد میونسپل ٹرانسپورٹ سروس بسوں کو بڑے خسارے کا سامنا کرنا پڑ رہا ہے۔ جہاں ہر روز 25 لاکھ روپے کا نقصان ہوتا نظر آرہا ہے۔
ذرائع کے مطابق احمدآباد کے سارنگپور اور بس اسٹینڈ سے ہر روز 73 اے ایم ٹی ایس بسیں چلائی جاتی تھیں۔ اس کے علاوہ دو سو سے زائد دیگر علاقوں کی بسیں اس بس اسٹینڈ سے ہو کر گزرتی تھیں۔ یہاں سے تقریبا 50 ہزار مسافر اپ ڈاؤن کرتے تھے اور خاص طور سے 146 ڈرائیور اور کنڈکٹر ان بسوں میں ملازمت کر رہے تھے۔ لیکن لاک ڈاؤن ہونے کی وجہ سے 22 مارچ سے اے ایم ٹی ایس بسیں بند ہیں اور اب صرف غیر ریاستی مزدوروں کو ریلوے اسٹیشن تک پہنچانے کے لیے بسیں چلائی جا رہی ہیں۔ تاہم پیرا میڈیکل اسٹاف، کمپلسری اسٹاف اور کارپوریشن کے ملازمین وغیرہ کے لیے پچاس اے ایم ٹی ایس بسوں کو چلانے کا اہتمام کیا گیا ہے۔
احمدآباد میونسپل کارپوریشن کی جانب سے احمدآباد میں پہلی مرتبہ ایک اپریل سنہ 1947 سے اے ایم ٹی ایس بسوں کی شروعات احمدآباد کے جمالپور علاقے سے ہوئی تھی اور کورونا وائرس، لاک ڈاؤن ہونے کی وجہ سے تاریخ میں پہلی بار اتنے دنوں تک اے ایم ٹی ایس بسوں کو بند رکھا گیا ہے جو احمدآباد کے تقریبا 174 روٹس پر دوڑتی تھیں۔ اے ایم ٹی ایس بس نہ چلنے سے عوام بھی پریشان حال ہیں۔
ایسے میں احمدآباد میں ای ٹی وی بھارت کی نمائندہ نے احمدآباد کے سارنگپور علاقے میں موجود بس اسٹینڈ کا جائزہ لیا۔ مزید جانکاری کے لیے ویڈیو دیکھیں۔۔۔۔۔۔۔۔۔۔۔
