احمدآباد: یو اے پی اے قانون پر جمعیت علماء ہند گجرات کا سخت ردعمل

گجرات جمعیت علماء ہند کے سیکرٹری نثار احمد انصاری نے کہا کہ 'یو اے پی اے قانون کے تحت مسلمانوں کو نشانہ بنایا جارہا ہے، اپنے حق کی آواز اٹھانے والوں پر موجودہ حکومت یو اے پی اے لگا دے رہی ہے تاکہ وہ دوبارہ اپنے حق کی آواز بلند نہ کرسکیں۔

یو اے پی اے قانون کے ذریعے مسلمانوں کو نشانہ بنانے پر بدھ کے روز جمعیت علما ہند گجرات کے جنرل سیکریٹری نثار احمد انصاری نے اپنے سخت ردعمل کا اظہار کیا ہے۔

یو اے پی اے قانون کے تعلق سے جمعیت علماء ہند گجرات کے جنرل سیکریٹری نثار احمد انصاری نے کہا کہ 'تریپورہ میں جن لوگوں نے سب کچھ کھویا، جو مسجدوں کو جلنے سے بچانے گئے تھے ان پر یو اے پی اے لگادیا گیا اور وہ غنڈے شرپسند جو وہاں آگ لگاتے پھررہے تھے ان کو آزاد چھوڑ دیا گیا'۔

انہوں نے کہا کہ آج بھارت میں کوئی بھی اپنے حق کے لیے حکومت کے خلاف آواز اٹھاتا ہے تو اس پر یو اے پی لگادیا جاتا ہے، جس کے بعد وہ اپنی بے گناہی ثابت کرنے کے لیے در در بھٹکتا رہتا ہے۔

نثار احمد انصاری نے مزید کہا کہ یو اے پی اے کے ذریعہ حکومت لوگوں کی زبان بند کرنا چاہ رہی ہے، یہ قانون ملک کے عوام کے لیے سراسر ظلم ہے، اس کے لیے جمعیت علماء ہند ملک گیر پیمانے پر مہم چلارہی ہے اور ضرورت پڑی تو اس کے لیے ہم کورٹ بھی جائیں گے۔