احمد آباد: ریاست گجرات کے پرائمری اسکولوں میں جماعت 6 سے 12 تک کے طلبا کو ہندو دھرم کی مقدس کتاب بھگوت گیتا پڑھائے جانے کے معاملہ پر ہائی کورٹ نے اہم قدم اٹھایا ہے۔ گجرات میں اسکولوں میں بھگوت گیتا پڑھانے کے معاملے پر ہائی کورٹ میں ایک مفاد عامہ کی عرضداشت داخل کی گئی تھی۔ اس معاملے پر سماعت کرتے ہوئے گجرات ہائی کورٹ نے گجرات حکومت کو 19 جون تک جواب پیش کرنے کا حکم دیا ہے۔ دراصل گذشتہ سال گجرات حکومت نے اسکولوں میں بھگوت گیتا کو پڑھانے کے تعلق سے ایک سرکیولر جاری کیا تھا جس کے خلاف گجرات ہائی کورٹ میں مفاد عامہ کی ایک عرضی داخل کی گئی تھی۔
اس معاملے پر گجرات ہائی کورٹ میں درخواست گزار نے موقف اختیار کیا کہ حکومت نے ابھی تک اس معاملے میں جواب داخل نہیں کیا جس پر ہائی کورٹ کے ایکٹنگ چیف جسٹس کی بینچ نے گجرات حکومت سے سوال کیا کہ اتنا وقت گزر جانے کے باوجود اس معاملے پر جواب کیوں نہیں پیش کیا گیا؟ تاہم اس معاملے کی مزید سماعت 3 جولائی کو ہوگی۔ گجرات کی اسکولوں میں پرارتھنا اور دیگر تعلیمی سرگرمیوں میں بھگوت گیتا کو شامل کرکے بھگوت گیتا کا پاٹھ پڑھانے کا سرکولر جاری کیا گیا تھا۔
