گجرات اردو ساہتیہ اکادمی نے سیمینار کی دی اجازت

گجرات اردو ساہتیہ اکادمی نے سیمینار اور مختلف پروگراموں کو دوبارہ شروع کرنے کی اجازت دے دی ہے۔ اس تعلق سے گجرات اردو ساہتیہ اکادمی کے ڈائریکٹر زین العابدین انصاری نے کہا کہ کورونا وائرس کے سبب تمام طرح کے پروگرام اور سیمینار نہیں ہورہے تھے اور آج میٹنگ میں ہم نے اس حوالے سے بات چیت کی۔

گجرات ساہتیہ اکادمی مختلف زبان و ادب کو فروغ دینے کے لیے کام کر رہی ہے، لیکن کورونا وائرس کے سبب سیمینار کا سلسلہ بند ہوگیا تھا، خاص طور سے گجرات میں اردو سیمینار کے بند ہونے سے اردو داں طبقے پر کافی اثرات مرتب ہوئے۔ ایسے میں سیمینار کی اہمیت اور وقت کی ضرورت کو سمجھتے ہوئے گجرات اردو ساہتیہ اکادمی نے سیمینار اور مختلف پروگراموں کو دوبارہ شروع کرنے کی اجازت دے دی ہے۔


دراصل گاندھی نگر میں گجرات ساہتیہ اکادمی نے 6 جنوری کو ایک میٹنگ کا اہتمام کیا جس میں گجرات ساہتیہ اکادمی کے چیئرمین اور اردو ساہتیہ اکادمی کے تمام دائریکٹر موجود رہے۔ اس موقع پر اردو زبان اور ادب سے جڑے تمام پروگرامز، سیمینار، ورکشاپ، مشاعرے اور اردو کو فروغ دینے کے لیے تمام طرح کی سرگرمیوں پر بات چیت کی گئی۔

اس تعلق سے گجرات اردو ساہتیہ اکادمی کے ڈائریکٹر زین العابدین انصاری نے کہا کہ کورونا وائرس کے سبب تمام طرح کے پروگرام اور سیمینار نہیں ہورہے تھے اور آج میٹنگ میں ہم نے اس حوالے سے بات چیت کی اور آنے والے وقت میں باقی تمام سیمینار کرنے کی اجازت دی جائے گی۔ 50 لوگوں کے ساتھ سیمینار کا اہتمام کرنے کی اجازت دی جائے گی اور کورونا کی گائیڈ لائن پر پوری طرح عمل کر تے ہوئے تمام سیمینار کا اہتمام کرنا ہوگا۔

انہوں نے مزید کہا کہ اس میٹنگ میں ہم نے ایک نیا منصوبہ تیار کیا ہے کہ گجرات میں اردو سیمینار کا اہتمام کیا جائے گا۔ احمدآباد میں سیمینار کا اہتمام کرنے والے لوگ دوسرے اضلاع میں بھی مختلف عنوان پر سیمینار کا انعقاد کریں۔ ایسی ایک تجویز منظور کی گئی ہے تاکہ پورے گجرات کے ہر ضلع میں اردو زبان و ادب کو فروغ حاصل ہو۔