دہلی کے وزیراعلیٰ اروند کجریوال احمدآباد میں پارٹی کے نئے دفتر کے افتتاح کے لئے پہنچ گئے ہیں۔ عام آدمی پارٹی 2022 میں ہونے والے اسمبلی انتخابات لڑنے کی تیاری میں ہے۔ یہ جانکاری پارٹی کے ایک ترجمان نے دی ہے۔
پارٹی دفتر کے افتتاح کے بعد کجریوال نے پریس کانفرنس سے خطاب کرتے ہوئے کہا کہ اب گجرات بدلے گا۔ یہاں کی عوام کو 27 سالوں سے دو پارٹیوں نے استعمال کیا ہے۔ گجرات کے تاجر خوف زدہ ہیں، بی جے پی اور کانگریس ایک دوسرے کی مدد کرتے ہیں۔ 2022 کے اسمبلی انتخابات میں عآپ سبھی سیٹوں پر مقابلہ کریں گی۔
واضح رہے کہ اروند کجریوال ایک دن کے دورے پر گجرات پہنچے ہیں۔ یہ دوسرا موقع ہے جب کجریوال گجرات پہنچے ہیں۔ وہ اس سے پہلے فروری میں سورت گئے تھے، جہاں بلدیاتی انتخابات میں پہلی بار عام آدمی پارٹی میدان میں اتری اور یہ پارٹی حزب اختلاف کے طور پر ابھری تھی۔
