ایل او سی پر حالات کشیدہ، نوشہرہ سیکٹر میں گولہ باری

ریاست جموں و کشمیر میں سرحدی ضلع راجوری کے نوشہرہ سیکٹر میں پاکستانی افواج نے جنگ بندی کی خلاف ورزی کرتے ہوئے منگل کی شام کو پھر سے گولہ باری شروع کی۔ جو خبر لکھے جانے تک جاری ہے۔

فوجی ذرائع کے مطابق پاکستانی فوج نے نوشہرہ میں قائم بھارتی فوجی چوکیوں کو نشانہ بناتے ہوئے چھوٹے اور درمیانہ درجے کے ہتھیاروں کا استعمال کیا۔ جس کا بھارتی افواج نے بھی معقول جواب دیا۔

ذرائع نے مزید بتایا کہ گولہ باری کے اس تازہ تبادلے کے دوران کوئی جانی نقصان نہیں ہوا۔

خبر لکھے جانے تک وقفے وقفے سے گولہ باری کا سلسلہ جاری تھا۔

واضح رہے کہ راجوری کے کیری اور کلال علاقوں میں پیر اور منگل کی درمیانی شب بھارت و پاکستانی افواج کے مابین ایک گھنٹے تک گولہ باری کا تبادلہ ہوا تھا۔