'صفاپورہ میں ویسٹ مینیجمینٹ پلانٹ منظور نہیں'

ماہرِ ماحولیات کا کہنا ہے کہ سولڈ ویسٹ مینیجمینٹ پروجیکٹ کو دیکھتے ہوئے یہ کہا جا سکتا ہے کہ اس سے مانسبل جھیل کو خطرہ لاحق ہو سکتا ہے۔

وسطی کشمیر میں گاندربل ضلع کے صفاپورہ کے لوگوں نے علاقے میں بنائے جانے والے ویسٹ مینیجمینٹ پلانٹ کی مخالفت کرتے ہوئے کہا کہ اس سے آنے والی نسلوں پر بُرا اثر پڑے گا۔
خیال رہے کہ میونسپل کمیٹی گاندربل کو کوہستان کالونی صفاپورہ میں 25 کنال سرکاری اراضی سولڈ ویسٹ مینیجمینٹ پروجیکٹ بنانے کے لئے وقف کی گئی ہے جس پر سروے ہو گیا ہے۔
مقامی لوگوں نے کہا کہ اگر انتظامیہ نے کروڑوں روپے صرف کر کے وادی کا اکلوتا انجینئرنگ کالج بنایا ہے اور اب اسی کے دامن میں پورے ضلع کی غلاظت کے ڈھیر بھی جمع کیے جائیں گے جو ناقابل قبول ہے۔
انہوں نے کہا کہ جو زمین سولڈ ویسٹ مینیجمینٹ پروجیکٹ بنانے کے لئے وقف کی گئی ہے، اس کے بالکل قریب کھیل کا میدان بھی بنایا گیا ہے جس کے لیے گورنمنٹ خزانے سے دو دو بار موٹی رقومات بھی نکالی گئی ہیں۔

واضح رہے کہ سیول سوسائٹی صفاپورہ کی جانب سے پہلے ہی ڈپٹی کمشنر گاندربل کو ایک عرضی پیش کی گئی ہے جس میں اس سے ہونے والے نقصانات اور عوامی حلقوں میں پیدا ہونے والے غصے کا بھی ذکر کیا گیا ہے۔

ادھر ماہرین ماحولیات کا کہنا ہے کہ اس سولڈ ویسٹ مینیجمینٹ پروجیکٹ کی اونچائی دیکھتے ہوئے یہ کہا جا سکتا ہے کہ اس سے مانسبل جھیل کو خطرہ لاحق ہو سکتا ہے۔

انہوں نے کہا کہ بارش اور آندھی سے پوری غلاظت مانسبل جھیل میں چلی جائے گی۔ ان کا کہنا تھا کہ اس سے قبل بھی وادی میں کئی جگہ پر سولڈ ویسٹ مینیجمینٹ پروجیکٹ بنائے گئے تھے۔ تاہم ان کی حالت بدترین ہوگئی۔

مقامی لوگوں نے کہا کہ اس جگہ کو کیمپنگ وغیرہ کے لیے استعمال کیا جاتا ہے اور مقامی لوگ یہاں اپنے مال مویشی کو چراتے تھے۔ تاہم اب اس سولڈ ویسٹ مینیجمینٹ پروجیکٹ بنانے سے ان کے روزگار کو بھی ختم کیا جائے گا۔

مقامی لوگوں نے کہا کہ اگر انتظامیہ نے اپنا فیصلہ واپس نہیں لیا تو مقامی لوگ سڑکوں پر نکل کر احتجاج کریں گے۔