سری نگر: وسطی ضلع گاندربل کے پرنگ کنگن علاقے میں ہفتے کی صبح بادل پھٹنے سے سیلابی صورت حال پیدا ہوئی جس کے نتیجے میں چند رہائشی مکانوں اور مسجد کو جزوی نقصان پہنچا ہے۔ اطلاعات کے مطابق پرنگ کے گجر پتی علاقے میں ہفتے کی صبح اس وقت سنسنی کا ماحول پھیل گیا جب بادل پھٹنے کی وجہ سے اچانک ندی نالوں میں طغیانی آگئی اور دیکھتے ہی دیکھتے گاؤں میں سیلابی صورت حال پیدا ہوئی۔ مقامی لوگوں نے بتایا کہ سیلابی پانی سے رہائشی مکانوں اور مسجد کو جزوی طورپر نقصان پہنچا ہے۔ معلوم ہوا ہے کہ اطلاع موصول ہوتے ہی پولیس، سیول انتظامیہ اور مقامی رضاکار تنظیمیں فوری طورپر جائے وقوع پر پہنچیں اور ریسکیو آپریشن شروع کیا۔ نامہ نگار نے بتایا کہ علاقے کے لوگوں کو محفوظ جگہ منتقل کیا گیا ہے۔
سرکاری ذرائع نے بتایا کہ نصف درجن کے قریب کنبوں کو محفوظ جگہ منتقل کردیا گیا ہے۔ انہوں نے بتایا کہ سڑکوں پر موجود ملبے کو ہٹانے کی خاطر مشینوں کو کا م پر لگا دیا گیا ہے ۔ ان کے مطابق بادل پھٹنے کی وجہ سے کسی کے زخمی یا ہلاک ہونے کے بارے میں کوئی اطلاع موصول نہیں ہوئی ہے۔ بتادیں کہ وادی کشمیر میں پچھلے ایک ماہ سے بادل پھٹنے کے متعدد واقعات رونما ہو ئے ہیں ۔ محکمہ موسمیات نے جمعے کے روز ہی پیشین گوئی کی کہ وادی کشمیر میں اگلے تین روز تک بارشوں کا امکان ہے جس کے پیش نظر پہاڑی علاقوں میں بادل پھٹنے ، مٹی کے تودے گرنے کا امکان ہے۔
یہ بھی پڑھیں: Cloudburst wreaks havoc in tral: ترال میں بادل پھٹنے سے فصلوں کو نقصان
یو این آئی
