گاندربل: پریس انفارمیشن بیورو (پی آئی بی) سرینگر کی جانب سے وسطی کشمیر کے گاندربل ضلع میں میڈیا ورکشاپ ”وارتا لاپ“ کا انعقاد کیا گیا۔ منتظمین کے مطابق ورکشاپ کے انعقاد کا مقصد ضلع اور ذیلی ضلع سطح پر کام کرنے والے صحافیوں اور پی آئی بی کے درمیان براہ راست رابطہ قائم کرنا تھا۔ منی سیکرٹریٹ میں منعقد ہونے والے اس ورکشاپ کا افتتاح ایڈیشنل ڈائریکٹر جنرل، شمالی علاقہ جات راجندر چودھری اور ڈپٹی کمشنر، گاندربل، شیامبیر سنگھ نے مشترکہ طور پر کیا۔ افتتاحی خطاب میں چودھری نے کہا کہ ’’ورکشاپ کے انعقاد کا مقصد عام لوگوں کے فائدے کے لیے مرکزی حکومت کے مختلف اقدامات کو اجاگر کرنے کے لیے مقامی میڈیا تک پہنچنا ہے۔‘‘ انہوں نے مزید کہا کہ میڈیا حکومت کی آنکھ اور کان کا کام کرتا ہے اور اس طرح کی ہم آہنگی فیڈ بیک حاصل کرنے اور زمینی سطح پر اسکیموں کے نفاذ سے متعلق خدشات کو دور کرنے کے لیے بھی ضروری ہے۔
چودھری نے صحافیو کو مشورہ دیا کہ ضلع اور سب ضلع سطح پر میڈیا کو ترقیاتی کاموں کی تشہیر کے لیے اہم معلومات پر مبنی پی آئی بی کے پس منظر والے انفوگرافکس اور فیکٹ شیٹس کا استعمال کرنا چاہیے اور انہیں معلومات اور فیڈ بیک کے لیے لازماً عوام کی نوٹس میں لانا چاہیے۔ انہوں نے زور دیا کہ میڈیا کو غلط معلومات اور افواہوں، جو کہ بعض اوقات مختلف سوشل میڈیا پلیٹ فارمز پر تیزی سے پھیلتی ہیں جس سے لوگوں میں الجھن پیدا ہوتی ہے، کا مقابلہ کرنے کے لیے پی آئی بی فیکٹ چیک کی پیروی کرنی چاہیے۔
راجندر چودھری نے پریس انفارمیشن بیورو، جموں و کشمیر اور وزارت کی دیگر میڈیا اکائیوں کے ذریعے کی جانے والی مختلف میڈیا سرگرمیوں کے بارے میں تفصیلی پریزنٹیشن دی۔ انہوں نے مرکزی حکومت کے اقدامات جیسے ’’ایک بھارت شریسٹرا بھارت‘‘ ، ’’ آزادی کویسٹ‘‘ اور دیگر پروگرامز کا جائزہ بھی پیش کیا۔ اپنے خطاب میں ڈی سی گاندربل، شیامبیر سنگھ نے میڈیا ورکشاپ کے انعقاد کے لیے پی آئی بی سرینگر کی کوششوں کو سراہا اور انہوں نے اسے میڈیا اور حکومت کے درمیان مکالمے کا بہترین پلیٹ فارم قرار دیا۔ ڈی سی گاندربل نے ضلع میں تعمیر و ترقی کا منظرنامہ بھی پیش کیا اور ضلع میں مرکزی حکومت کی مختلف اسکیموں اور اقدامات کے تحت ہونے والی پیش رفت کے بارے میں شرکاءکو آگاہ کیا۔
مزید پڑھیں: Vartalap with Baramulla Scribes: پی آئی بی نے بارہمولہ میں صحافیوں کے ساتھ نشست کا انعقاد کیا
تکنیکی سیشنز کے بعد انٹرایکٹو سوال و جواب کا سیشن بھی منعقد ہوا جس میں صحافیوں کا ماہرین سے تبادلہ خیال ہوا اور انہوں نے مختلف اسکیموں اور پروگراموں کے بارے میں اپنے شکوک و شبہات کو دور کیا۔ صحافیوں نے ورکشاپ کے انعقاد پر پی آئی بی کا شکریہ ادا کیا اور امید ظاہر کی کہ مستقبل میں ایسے مزید ورکشاپس کا انعقاد کیا جائے گا۔
