جموں وکشمیرکےگاندربل ضلع کے گنڈ کےمقامی لوگوں نے پرائمری ہیلتھ سنٹر گنڈ میں بنیادی سہولیات کے فقدان پر احتجاج کیا۔
مقامی لوگوں نے بتایا کہ بنیادی سہولیات کی کمی کے ساتھ ساتھ ڈاکٹروں اور نیم طبی عملے کمی کی وجہ سے گنڈ اور اس سے ملحقہ علاقوں میں گوناگوں مشکلات کا سامنا کرنا پڑ رہا ہے۔
ان کے مطابق گنڈ اور اس سے ملحقہ 30 سے زائد علاقوں میں رہائش پذیر ہزاروں کی آبادی میں مختلف امراض میں مبتلا افراد کو گاندربل، سرینگر کے مختلف ہسپتالوں کی جانب رخ کرنا پڑ رہا ہے، جس کے نتیجے میں وقت اور روپیے کا ضیاع ہوتا ہے۔ جبکہ گنڈ اور اس سے ملحقہ علاقوں میں ایسے بھی لوگ رہتے ہیں جو مزدوری پر گزر بسر کرتے ہیں۔
یہ بھی پڑھیں:اننت ناگ: این آئی اے کی کئی مقامات پر چھاپے ماری
انہوں نے یہ بھی کہا کہ پی ایچ سی گنڈ میں آپریشن تھیٹر کے قیام کے لئے لاکھوں روپے خرچ کئے گئے تاہم آپریشن تھیٹر کی مشینری چلانے کے لیے بھی ڈاکٹروں کی تعیناتی عمل میں نہیں لائی گئی،جس کی وجہ سے آپریشن تھیٹر میں پڑی ہوئی لاکھوں روپے مالیت کی مشینری زنگ آلود ہوچکی ہے۔
اس سلسلے میں مقامی لوگوں نے لیفٹیننٹ گورنر منوج سنہا اور محکمہ صحت کے اعلیٰ حکام سے درخواست کی ہے کہ وہ ذاتی طور پر اس معاملے کو دیکھیں اور ہمارے مطالبے کو پورا کریں تاکہ ہمیں مستقبل میں کسی قسم کی پریشانی کا سامنا نہ کرنا پڑے۔
