گاندربل پولیس نے آبی گاہوں کی جانب ہجرت کرنے والے پرندوں کی حفاظت کو ماحولیاتی نظام کا ایک اہم حصہ قرار دیتے ہوئے کہا ہے کہ اس کو ہر حالت میں محفوظ رکھنے کی ضرورت ہے۔
سردیوں کے موسم میں نقل مکانی کرنے والے پرندے جموں وکشمیر کی آبی گاہوں کی جانب رخ کرتے ہیں لیکن شکاری ان کے اصل دشمن ہیں جو ان پرندوں کا شکار کر کے ناقابل تلافی نقصان کا سبب بنتے ہیں۔
گاندربل پولیس نے ان شکاریوں کے خلاف کاروائی کے لیے خصوصی مہم شروع کردی ہے اور وائلڈ لائف پروٹیکشن ایکٹ کے تحت پولیس نے تھانہ گاندربل میں ایف آئی آر بھی درج کیا ہے۔
اس سلسلے میں پولیس نے کاروائی کرکے دو ملزمین جاوید احمد ولد محمد یوسف، ساکن فتح پورہ گاندربل اور دوسرا مشتاق احمد ولد غلام رسول، ساکن فتح پورہ گاندربل کو فوری کیس میں گرفتار کیا ہے۔
ملزمین پرلائسنس یافتہ اسلحہ کا غلط استعمال کرنے اور ضلع گاندربل کے علاقہ شالبغ کے آبی گاہ میں بڑی تعداد میں آبی پرندوں کا شکار کرنے کا الزام ہے۔
ایس ایس پی گاندربل خلیل احمد پوسوال نے لائسنس یافتہ اسلحہ کا غلط استعمال کرنے اور ہجرت کرنے والے پرندوں کا شکار کرنے والے ایسے افراد کے لائسنس کو منسوخ کرنے کے لیے ضلع مجسٹریٹ گاندربل کے ساتھ معاملہ اٹھایا ہے۔ انہوں نے پولیس کی خصوصی ٹیمیں تشکیل دے کر انہیں ویٹ لینڈ ایریا میں نگاہ رکھنے اور ان قصورواروں کے خلاف کاروائی کو یقینی بنانے کے لیے احکامات جاری کر دیے ہیں۔
