گاندربل: سونمرگ میں برفانی تودا گر نے کی وجہ سے تین ٹرکیں برف کے نیچے دب گئی ہیں۔ بتایا جا رہا ہے کہ سرینگر لہہ قومی شاہرہ پر سونمرگ کے سیاحتی مقام زوجلہ پر اتوار کو برفانی تودا گر آیا جس کے نتیجے میں تین ٹرکیں اس کی زد میں آگئی ہیں۔ تاہم اس دوران کوئی بھی جانی نقصان کی کوئی اطلاع موصول نہیں ہوئی۔ اس دوران پولیس اور دیگر عملہ بچاؤ اور راحت رسانی کے کام میں مصروف ہوگئے ہیں۔ برفانی تودہ گرنے کے سبب ٹریفک کی نقل وحرکت بھی متاثر ہوگئی۔ یہاں یہ بات قابل ذکر ہے کہ حکام نے 4 اضلاع میں پہلے سے ہی برفانی تودے گرنے کی وارنگ دی تھی۔
اس سے قبل ایک فروری کو وادی کشمیر کے معروف سیاحتی مقام گلمرگ میں برفانی تودہ گرنے سے نصف درجن کے قریب سیاح پھنس گئے تھے جس کے بعد ریسکیو آپریشن ٹیم کے ذریعے 19بین الاقوامی سیاحوں اور دو مقامی گائیڈز کو ریسکیو کیا گیا۔ واضح رہے کہ دو ہفتہ قبل وسطی کشمیر کے گاندربل ضلع میں بھی برفانی تودہ کی زد میں آکر دو غیر مقامی مزدور ہلاک ہو گئے تھے۔ حکام کی جانب سے برفانی تودوں کی وارننگ جاری کرکے مقامی باشندوں، سیاحوں کو ہوشیار رہنے کی تلقین کی جا رہی ہے۔ وہیں چار اپریل کو سکم کے علاقے ناتھولا میں برفانی تودہ گرنے سے 6 سیاح ہلاک اور 11 دیگر زخمی ہو گئے تھے۔ اس وقت عہدیداروں نے بتایا کہ تقریباً 80 گاڑیوں میں سوار 350 افراد جو ناتھو لا سے سڑک بند ہونے کی وجہ سے پھنسے ہوئے تھے، جنہیں واپس لایا گیا۔
