موجودہ دور میں جہاں ٹکنالوجی نے انسانوں کو ہر قدم پر آسائش فراہم کی ہے اور انسان اب مریخ پر دنیا بسانے کی فکر میں ہے لیکن جموں کشمیر کے پہاڑی ضلع ڈوڈہ کے مختلف دیہات میں لوگ آج بھی بنیادی سہولیات کے لئے جد وجہد کر رہے ہیں جس میں رابطہ سڑک سر فہرست ہے۔
ڈوڈہ کے درجنوں دیہات کے باشندے ہر روز سڑک کی عدم دستیابی سے کئی طرح کی مشکلات سے دوچار ہیں۔ یہاں سڑک سہولت نہ ہونے کی وجہ سے مریضوں کو پالکی پر اسپتال پہنچانا پڑتا ہے۔
ایک ایسا ہی معاملہ ہفتے کے روز ملوانہ پونیکر میں پیش آیا، جہاں گاؤں کے باشندوں نے شدید بیمار خاتون کو پالکی میں اُٹھا کر سڑک تک پہنچایا۔
اس دوران گاؤں کے لوگوں نے انتظامیہ کے خلاف جم کر نعرہ بازی کی اور مقامی بی جے پی سابق ایم ایل اے ڈوڈہ کے خلاف وعدہ خلافی کا الزام عائد کیا۔ مقامی عوام کا کہنا ہے کہ اُن کے ساتھ مذاق کیا جا رہا ہے۔
ڈوڈہ کے مشرقی علاقہ پونیکر ملوانہ کے مقامی باشندہ سوجیت پریہار نے بتایا کہ سڑک کی عدم دستیابی کے باعث اُنہیں مشکلات کا سامنا کرنا پڑرہا ہے۔ ہنگامی صورتحال کے دوران پالکی کو کندھا لگاکر سڑک تک بیمار کو پہنچانا پڑتا ہے جس دوران مریض فوت ہوجاتے ہیں۔
مقامی لوگوں نے سابق وزیر مملکت و ایم ایل اے ڈوڈہ شکتی راج پریہار کو سڑک کی سہولت فراہم نہ کرنے کا الزام عائد کیا۔ مقامی لوگوں نے اس بات کا ذکر کیا کہ اُنہوں نے بی جے پی کو منتخب کرکے غلط فیصلہ کیا ہے۔
ملوانہ کے یوتھ لیڈر مکیش پریہار نے بتایا کہ وہ ضلع انتظامیہ اور محکمہ تعمیرات عامہ ڈوڈہ سے مسلسل سڑک کی تعمیر کی درخواست کر رہے ہیں لیکن اُن کی دیرینہ مانگ کو بالائے طاق رکھا گیا ہے۔
