خطہ چناب کے ضلع ڈوڈہ میں دیگر اضلاع کی طرح کورونا کا ہفتہ وار کرفیو جمعہ کی شام سے نافذ ہوا۔ جس کا اثر ضلع ڈوڈہ کے قصّبہ جات میں ہفتہ، اور اتوار کے روز بھی دیکھنے کو ملا۔ جس وجہ سے نظام زندگی مفلوج ہو کر رہ گئی ہے۔
ضلع بھر میں سڑکوں پر پبلک ٹرانسپورٹ مکمل طور بند رہا۔ جبکہ چند نجی گاڑیاں چل رہی تھیں۔ قصّبہ ڈوڈہ میں کورونا کرفیو کو یقینی بنانے کے لئے انتظامیہ کی طرف سے تمام داخلی راستوں کو خار دار تار کے ساتھ سیل کیا گیا تھا۔ ان چیک پوائنٹ پر بھاری تعداد میں پولیس، نیم فوجی دستوں کو تعینات کیا گیا۔
تاہم حکم نامہ کے مطابق اشیاء ضروریہ، ادویات خریدنے کے لئے لوگوں کو چھوٹ دی گئی ہے اور اُنہی لوگوں کو کرفیو میں آنے جانے کی اجازت دی جا رہی ہے۔
قصّبہ ڈوڈہ میں داخل ہونے والے ہر فرد کو پوچھ تاچھ کے بعد ہی چلنے کی اجازت دی گئی۔ کورونا کرفیو کی وجہ سے شہر میں سناٹا چھایا رہا۔ جبکہ گلی کوچے ویران پائے گئے۔ حکومت کی طرف سے جموں و کشمیر کے سبھی اضلاع میں کورونا کرفیو میں 17 مئی تک توسیع کے بعد لوگوں میں زبردست ناراضگی پائی جا رہی ہے۔چونکہ عید چند روز دور ہے ایسے میں کرفیو میں توسیع ایک بڑی پریشانی کا سبب بن گیا ہے۔
