جموں و کشمیر میں ڈی ڈی سی اے و پنچایت کے ضمنی انتخابات کے تیسرے مرحلے کے لئے ڈسٹرکٹ الیکشن اتھارٹی ڈوڈہ نے 90 پولنگ پارٹیوں کو اپنے اپنے پولنگ مراکز کی طرف روانہ کیا۔
پولنگ عملہ کو ڈسٹرکٹ پنچایت الیکشن آفیسر ڈاکٹر ساگر ڈی ڈائفوڈ کی نگرانی میں حلقہ انتخاب بھدرواہ ایسٹ اور بھدرواہ ویسٹ کے لئے سخت سیکورٹی انتظامات کے ساتھ بھیجا گیا، جہاں کل یعنی جمعہ کو ووٹ ڈالے جائیں گے۔
یہ بھی پڑھیں: چار روز تک جموں سرینگر شاہراہ پر ٹریفک معطل رہے گا
مذکورہ انتخابی حلقوں کے لئے روانہ کیے گئے عملہ میں جموں و کشمیر پولیس اور مرکزی نیم فوجی دستوں کے مناسب حفاظتی اہلکار پولنگ عملہ میں شامل کئے گئے ہیں۔ انتخابی حکام کے مطابق ڈی ڈی سی حلقہ بھدرواہ ایسٹ میں رائے دہندگان کے لئے 50 پولنگ مراکز جبکہ بھدرواہ ویسٹ میں 40 پولنگ مراکز قائم کئے گئے ہیں۔
دونوں حلقوں میں کانگریس، این سی، بی جے پی، پینتھرس پارٹی کے علاوہ آزاد امیدواروں سمیت 23 امیدوار انتخابات میں اپنی قسمت آزما رہے ہیں۔
