ڈوڈہ میں محکمہ صحت دفتر کے احاطہ میں عارضی ملازمین نے پی ایچ ای ملازمین یونائیٹڈ فرنٹ کے بینر تلے دھرنا دیا اور حکومت سے اپیل کرتے ہوئے کہا کہ انہیں نہ سہی ان کے بچوں کے مستقبل کو برباد ہونے سے بچایا جائے۔
فرنٹ کے رہنما عبدالرشید جرال نے بتایا کہ سات فروری کو تمام عارضی ملازمین نے تنگ آکر کام چھوڑ ہڑتال کا اعلان کیا تھا اور مسلسل دو ہفتوں تک نل سے جل کا سلسلہ روک دیا تھا جس وجہ سے پورے ضلع میں پانی کا بحران پیدا ہو گیا تھا۔
اُنہوں نے بتایا کہ فرنٹ کے ریاستی سطح کے رہنماؤں نے لفٹینٹ انتظامیہ کے سکریٹری سے ملاقات کی اور حکام نے عارضی ملازمین کے کچھ مطالبات کو تسلیم کیا ہے، اس لئے فرنٹ نے فیصلہ کیا ہے کہ ہڑتال کو ختم کرکے حکومت کو پالیسی بنانے کے لئے مزید وقت دیا جائے۔
اُنہوں نے بتایا کہ وہ تیس اپریل تک اپنے فرائض کو بغیر کوئی رکاوٹ انجام دیتے رہیں گے۔ اگر مقررہ مدّت کے اندر کوئی عمل درآمد نہیں ہوتا ہے تو احتجاج ہڑتال کا سلسلہ پھر سے شروع ہو جائے گا۔
