جموں وکشمیر کےخطہ چناب کی سڑکوں پر بالخصوص بٹوت کشتواڑ قومی شاہراہ پر سڑک حادثات کا سلسلہ جاری ہے۔ ڈوڈہ کے کھلینی نالے میں اتوار کی صبح ایک ماروتی کار زیر نمبرJK02T 5058 جو ڈوڈہ کی طرف جارہی تھی ۔لیکن ڈوڈہ پہنچنے سے قبل ہی کھلینی نالے میں ڈرائیور کے قابو سے باہر ہوکر دو سو فِٹ گہرے نالے میں جاگری۔ جس کے نتیجہ میں ایک شخص کی موقع پر ہی موت واقع ہوگئی۔
موصول اطلاعات کے مطابق سڑک کا یہ حادثہ ڈوڈہ صدر مقام سے پانچ کلو میٹر دور شمال مشرقی علاقہ کھلینی نالے میں پیش آیا۔
یہ بھی پڑھیں:شوپیان:سی آر پی ایف کی فائرنگ میں عام شہری کی موت
حادثہ کی خبر پھیلتے ہی مقامی لوگوں کے علاوہ پولیس نے جائے حادثہ پر پہنچ کر لاش کو میڈیکل کالج ڈوڈہ منتقل کیا۔ جہاں قانونی لوازمات پورے کرنے کے بعد لاش کو لواحقین کے حوالے کیا گیا۔ حادثہ میں جاں بحق ہونے والے کی شناخت عاشق حسین شاہ ولد غلام شاہ ساکن اکرم آباد ڈوڈہ کے طور پر ہوئی ہے۔
واضح رہے کہ کھلینی نالے میں ایک ماہ کے اندر یہ چوتھا سڑک حادثہ ہے جس میں چھ افراد کی موت واقع ہوئی ہے۔
