گزشتہ چوبیس گھنٹوں کے دوران خطہ چناب کے ضلع ڈوڈہ میں زلزلہ کا دوسرا جھٹکا محسوس کیا گیا۔ منگل کی شب گیارہ بجکر 32 منٹ پر زلزلے کا ایک اور جھٹکا محسوس کیا گیا۔
منگل کو آئے زلزلے کی شدّت ریکٹر اسکیل پر چار اعشاریہ سات ریکارڈ کی گئی ہے۔ اس کا مرکز بھدرواہ سے پانچ کلو میٹر دور جنوب مشرقی علاقہ میں بتایا گیا ہے۔
خطہ چناب میں مسلسل زلزلے کے جھٹکے محسوس کئے جا رہے ہیں اور گزشتہ دو یوم کے اندر دو مرتبہ زلزلے کے جھٹکے محسوس کئے گئے ہیں جس کی وجہ سے لوگوں میں خوف و ہراس پھیل گیا۔
گزشتہ شب جب زلزلے کے جھٹکے محسوس کئے گئے تو ضلع میں بیشتر لوگ گہری نیند میں تھے لیکن جب زلزلے کا جھٹکا محسوس ہوا تو سب بیدار ہو گئے اور محفوظ مقامات کی طرف چلے گئے لیکن ایک ہی زلزلہ کا جھٹکا شدّت سے آیا اُس کے بعد یہ سلسلہ تھم گیا۔
ڈوڈہ قصّبہ کے لوگوں کا کہنا ہے کہ تین، چار منزلہ عمارتوں میں زلزلے کی شدّت کو زیادہ محسوس کیا گیا کہیں جگہوں پر لوگوں نے چیخ و پکار بھی شروع کر دی اسی طرح پوری شب لوگوں نے خوف کے سائے میں گزاری۔
