ریاست اترکھنڈ کے اترکاشی علاقے میں پیر اور منگل کی درمیانی شب ایک دلدوز واقعہ پیش آیا جس میں ایک کشمیری مزدور زندہ جل گیا اور پانچ دیگر زخمی ہوگئے۔
اطلاعات کے مطابق اترکاشی علاقے میں ایک جھونپڑی میں اچانک آگ نمودار ہوئی جس نے آنا فانا پوری جھونپڑی کو اپنی چپیٹ میں لے لیا۔ ذرائع کے مطابق اس جھونپڑی میں کشمیری مزدور رہائش پذیر تھے۔
اگرچہ مقامی لوگوں نے آگ کو قابو کرنے کی جی توڑ کوشش کی تاہم اس دوران ایک کشمیری مزدور زندہ جھلس کر ہلاک ہو گیا اور پانچ دیگر زخمی ہوگئے۔
ہلاک اور زخمی افراد کا تعلق پہاڑی ضلع ڈوڈہ کے ٹانٹہ، بھلیسہ اور کھرنگل بھلیسہ سے بتایا جاتا ہے۔
زخمی افراد کا اٹراکھنڈ کے اتراکاشی ہسپتال میں علاج و معالجہ کیا جا رہا ہے۔
مزید پڑھیں؛ غلام نبی آزاد کو الوداع کرتے ہوئے وزیر اعظم رو پڑے
ہلاک ہوئے شخص کی شناخت محمد سکندر ولد غلام حسین ساکنہ ٹانٹہ بھلیسہ کے طور پر ہوئی ہے جب کہ شاہد حسین ولد محمد شریف، ناصر احمد ولد محمد شریف، فاروق احمد ولد محمد شریف ساکنہ گندوہ بھلیسہ اور دین محمد ولد شاہ دین وانی تحصيل کاہرہ بھلیسہ زخمی ہوئے ہیں۔
حادثے کی خبر ڈوڈہ پہنچے ہی علاقے میں کہرام مچ گیا۔ مقامی باشندوں نے ضلع انتظامیہ اور گورنر انتظامیہ سے متوفی کے اہل خانہ اور زخمی ہوئے افراد کو امداد فراہم کرنے کی درخواست کی ہے۔
