ڈوڈہ کی ایک غیر سرکاری تنظیم ینگ سٹار کرکٹ کلب ڈوڈہ نے بدھ کو ایک پریس کانفرنس کا اہتمام کیا۔ پریس کانفرنس سے خطاب کرتے ہوئے تنظیم کے سرپرست منظور احمد نے بتایا کہ اُنہوں نے جموں و کشمیر لیبر ڈیپارنمنٹ کے کمشنر سیکریٹری سوربھ بھگت کے ڈوڈہ دورے کے دوران ملاقات کی اور قصبہ ڈوڈہ کی عوام کو درپیش مسائل پر بات چیت کی۔
ملاقات کے دوران بٹ نے کمشنر سیکریٹری کو ضلع ڈوڈہ میں کھیل سرگرمیوں کو فروغ دینے اور کھیل کے میدانوں سمیت دیگر بنیادی ڈھانچوں کو مضبوط کرنے کی بھی گزارش کی۔ انہوں نے کہا کہ ’’ضلع ڈوڈہ میں قومی سطح کا کرکٹ ٹورنمنٹ ہر سال منعقد کیا جاتا ہے اور بین الاقوامی کھلاڑی اس ٹورنمنٹ کی زینت بن چکے ہیں، لیکن گراؤنڈ کی حالت باعث تشویش ہے۔‘‘
پریس کانفرنس کے دوران بٹ نے دعویٰ کیا کہ اُنہوں نے کمشنر سیکریٹری سے مانگ کی کہ سپورٹس اسٹیڈیم ڈوڈہ کا تعمیراتی کام جلد از مکمل کیا جائے، اور گراونڈ پر جلد سے جلد ٹرف تیار کی جائے، اور نگرانی کے لئے اسٹیڈیم کو ڈی سی سی کے حوالے کیا جائے۔
