کورونا ویکسینیشن کی ڈوڈہ میں شروعات

اس موقع پر ڈپٹی کمشنر ڈوڈہ ڈاکٹر ساگر ڈی ڈائفوڈ نے کہا کہ ضلع میں پہلی کھیپ میں 1950 ویکسین کے ٹیکے فراہم کئے گئے ہیں۔ جس میں سے 100 ٹیکے فوج کو فراہم کئے جائیں گے۔

ملک کے دیگر حصوں کی طرح مرکز کے زیر انتظام علاقہ جموں وکشمیر کے ضلع ڈوڈہ میں بھی کووڈ ویکسینیشن میڈیکل کالج ڈوڈہ اور سی ایچ سی بھدرواہ کے دو مقامات پر شروع ہوئی۔

ہفتہ کے روز ملک کے وزیر اعظم نے صبح کے وقت ملک بھر میں ٹیکے لگانے کی مہم کا افتتاح کیا۔گورنمنٹ میڈیکل کالج ڈوڈہ میں منعقدہ افتتاحی تقریب کے موقع پر ڈپٹی کمشنر ڈوڈہ ڈاکٹر ساگر ڈی ڈائفوڈ کے ہمراہ انچارج پرنسپل جی ایم سی ڈوڈہ ڈاکٹر طارق حسین آزاد بھی موجود تھے۔

اس موقع پر ڈی سی نے خطاب کرتے ہوئے کہا کہ ڈوڈہ کے تمام لوگوں کے لئے یہ سنہرا دن ہے کہ کووڈ-19 وبائی بیماری کے خلاف طویل جدوجہد کے بعد یہ ویکسین دستیاب کر دی گئی ہے۔ جس کا سلسلہ آج سے شروع ہو رہا ہے۔

انہوں نے مزید کہا کہ ضلع میں پہلی کھیپ میں ضلع کو 1950 ویکسین کے ٹیکے فراہم کئے گئے ہیں۔ جس میں سے 100 ٹیکے فوج کو فراہم کئے جائیں گے۔